മൂവാറ്റുപുഴയിലെ അഞ്ചുവയസ്സുകാരിയുടെ നില ഗുരുതരം, മലദ്വാരത്തിലും കുടലിലും മുറിവുകൾ കണ്ടെത്തി

കോട്ടയം: മെഡിക്കൽ കോളജ് കുട്ടികളുടെ ആശുപത്രി സർജറി തീവ്രപരിചരണ വിഭാഗത്തിൽ ചികിത്സയിൽ കഴിയുന്ന അസം സ്വദേശികളുടെ മകളായ അഞ്ചുവയസ്സുകാരിയുടെ ആരോഗ്യനില ഗുരുതരം. വിദഗ്ധ പരിശോധനയിൽ മലദ്വാരത്തിലും കുടലിലും മുറിവുകൾ കണ്ടെത്തി. അടിയന്തര ശസ്ത്രക്രിയക്ക് വിധേയമാക്കി. കുട്ടിയുടെ ആരോഗ്യനിലയിൽ വലിയ മാറ്റമില്ലെന്ന്​ ആർ.എം.ഒ ഡോ. ജയപ്രകാശ് അറിയിച്ചു.

അസം സ്വദേശികളും മൂവാറ്റുപുഴ പെരുമുറ്റത്ത്​ വാടകക്ക്​ താമസിക്കുന്നവരുമായ ദമ്പതികളുടെ കുഞ്ഞിനെ​ 27 നാണ് ആശുപത്രിയിൽ പ്രവേശിപ്പിച്ചത്. വയറുവേദനയും വയർ വീർത്തുവരുകയും മലദ്വാരത്തിലൂടെ രക്തം പോകുന്നതും ശ്രദ്ധയിൽപെട്ട മാതാപിതാക്കൾ മൂവാറ്റുപുഴയിലെ സ്വകാര്യ ആശുപത്രിയിൽ പ്രവേശിപ്പിച്ചു. അവിടെനിന്നാണ് കോട്ടയം മെഡിക്കൽ കോളജിലെ കുട്ടികളുടെ ആശുപത്രിയിൽ എത്തിച്ചത്. വിശദ പരിശോധനയിൽ കുട്ടി ലൈംഗിക അതിക്രമത്തിന്​ ഇരയായതായി ഡോക്​ടർമാർക്ക്​ സംശയമുയർന്നു​. ഇതോടെ പൊലീസിൽ അറിയിച്ചു.

കുട്ടിയുടെ പിതാവും രണ്ടാനമ്മയുമാണ്​ ആശുപത്രിയിലുള്ളത്​​. പിതാവിനെ ചോദ്യം ചെയ്യാൻ പൊലീസ്​ വിളിപ്പിച്ചിരുന്നു​. കുട്ടിക്ക്​ എന്താണ്​ സംഭവിച്ചതെന്ന്​ അറിയില്ലെന്നാണ്​ രണ്ടാനമ്മയുടെ പ്രതികരണം. ചികിത്സയിൽ കഴിയുന്ന കുട്ടിയുടെ മാതാവിനെ സന്ദർശിച്ച നവജീവൻ തോമസ്, ചികിത്സക്ക്​ ആവശ്യമായ മുഴുവൻ സഹായവും വാഗ്ദാനം ചെയ്തു. കുട്ടിയെ പരിചരിക്കാൻ നവജീവൻ വളൻറിയർമാരെ വിട്ടുനൽകുമെന്നും മാതാവിനൊപ്പമുള്ള കുട്ടികൾക്ക്​ ഭക്ഷണം നൽകുമെന്നും അദ്ദേഹം പറഞ്ഞു.