പ്രളയക്കെടുതി ചർച്ച ചെയ്യാൻ നാളെ പ്രത്യേക നിയമസഭാ സമ്മേളനം

തിരുവനന്തപുരം: ​പ്രളയക്കെടുതിയും പുനർനിർമാണവും ചർച്ചചെയ്യാൻ നിയമസഭയുടെ പ്രത്യേക സമ്മേളനം വ്യാഴാഴ്​ച ചേരും. രാവിലെ ഒമ്പതുമുതൽ ഉച്ചക്ക്​ ഒന്നുവരെയാണ്​ ചർച്ച നിശ്ചയിച്ചിരിക്കുന്നതെങ്കിലും നീണ്ടേക്കും. എല്ലാ കക്ഷിനേതാക്കൾക്കും സംസാരിക്കാൻ അവസരം നൽകിയിട്ടുണ്ട്​. പ്രളയബാധിത മേഖലയിലെ സാമാജികരും ചർച്ചയിൽ പ​െങ്കടുക്കും.

ചർച്ചയിൽ വരുന്ന നിർദേശങ്ങൾ കൂടി പരിഗണിച്ചാകും ​പുനർനിർമാണത്തിന്​ കർമപദ്ധതി തീരുമാനിക്കുകയെന്ന്​ മുഖ്യമന്ത്രി പിണറായി വിജയൻ വ്യക്​തമാക്കിയിട്ടുണ്ട്​. 
ചട്ടം 130 പ്രകാരം മുഖ്യമന്ത്രിയാണ്​ നിയമസഭയിൽ ഉപക്ഷേപം അതരിപ്പിക്കുക. സംസ്​ഥാനത്ത്​ കാലവർഷക്കെടുതി ഉണ്ടാക്കിയ ഗുരുതര സ്​ഥിതിവിശേഷവും പുനർനിർമാണത്തിന്​ സ്വീകരിക്കേണ്ട നടപടികളും സഭ ചർച്ചചെയ്യണമെന്നാണ്​ പ്രമേയം. തുടർന്ന്​ വിശദചർച്ച നടക്കും. ഇതിന്​ മന്ത്രിമാരും മുഖ്യമന്ത്രിയും മറുപടിനൽകും. ചർച്ചക്ക്​ അവസാനം ചട്ടം 275 പ്രകാരം പ്രമേയവും ഉണ്ടായേക്കും.

ഇത്ര വലിയ ദുരന്തത്തിന്​ വഴിവെച്ചത്​ സർക്കാറി​​​െൻറ പിടിപ്പുകേടാണെന്ന നിലപാടാണ്​​ പ്രതിപക്ഷത്തിന്​. മുഖ്യമന്ത്രിക്കും സർക്കാറിനുമെതിരെ ഇതിനകം പ്രതിപക്ഷനേതാവ്​ രമേശ്​ ചെന്നിത്തല ആരോപണവുമായി രംഗത്തുവന്നിരുന്നു. ഇതി​​​െൻറ പ്രതിഫലനം സഭയിലുമുണ്ടാകും. ഒാഖിക്ക്​ ലഭിച്ച ഫണ്ട്​ ചെലവിട്ടില്ലെന്ന ആരോപണവും പ്രതിപക്ഷം ഉന്നയിച്ചിട്ടുണ്ട്​. ആരോപണങ്ങൾ സർക്കാർ തള്ളിയിരുന്നു. വ്യാഴാഴ്​ച വൈകീട്ടാണ്​​ ഇൗ ആഴ്​ചത്തെ പതിവ്​ മന്ത്രിസഭായോഗം നിശ്ചയിച്ചിരിക്കുന്നത്​.