ഒടുവിൽ ആ പൂവിന് പേരിട്ടു; ‘കൊറോണ പൂവ്’

ചവറ: കോവിഡ്-19 വൈറസി​​െൻറ സാങ്കൽപ്പിക രൂപത്തിൽ വിരിഞ്ഞ പൂവിനെ ഒടുവിൽ നാട്ടുകാർ വിളിച്ചു ‘കൊറോണ പൂവ്’. ചവറ തെക്കുംഭാഗം സര്‍ക്കാര്‍ ജി.എല്‍.വി.എല്‍.പി സ്കൂളിലെ ജൈവവൈവിധ്യ ഉദ്യാനത്തിലാണ് കോവിഡ് വൈറസ് മാതൃകയിലുള്ള പൂവ് വിരിഞ്ഞത്. 

ഓരോ ദിവസവും നിറം മാറുന്ന പൂവി​​െൻറ സവിശേഷത ആരുടേയും കണ്ണിൽ പെട്ടിരുന്നില്ല. ഫോട്ടോഗ്രാഫറും ചാനൽ കാമറാമാനുമായ ഗോപു നീണ്ടകരയാണ് പൂവി​​െൻറ ചിത്രം പകർത്തി സാമൂഹ്യ മാധ്യമത്തിൽ പങ്കിട്ടത്. ഇതോടെ കൊറോണ പൂവ് കാണാൻ പരിസരവാസികൾ എത്തി. 

ആറടി പൊക്കത്തിൽ വളർന്ന് നിൽക്കുന്ന ഇത്തിമരത്തി​​െൻറ പൂവാണ് കൊറോണ വൈറസ് മാതൃകയിൽ വിരിഞ്ഞത്. ഒരു പൂവ് മാത്രമേ ഈ ചെടിയിൽ വിരിഞ്ഞിട്ടുള്ളൂ. 

പൊതുവിദ്യാലയങ്ങളിൽ ഒരുക്കിയിട്ടുള്ള ജൈവവൈവിധ്യ ഉദ്യാനത്തിന് സംസ്ഥാന തലത്തിൽ ഏർപ്പെടുത്തിയ മൽസരത്തിൽ മൂന്നാം സ്ഥാനം നേടാൻ ഈ ഉദ്യാനത്തിന് കഴിഞ്ഞിട്ടുണ്ട്. നക്ഷത്രവനം, മധുര വനം, കിളികള്‍ക്ക് മുട്ടിയിടാനായി സ്വാഭാവിക കൂടുകള്‍, അറുപതില്‍പ്പരം ഔഷധ സസ്യങ്ങള്‍, തേനീച്ചക്കൂടുകള്‍ എന്നിവക്ക് പുറമെ കുളവും ഇവിടെ ഒരുക്കിയിട്ടുണ്ട്.