ആലപ്പുഴയിൽ നിർമാണത്തിലിരുന്ന മേൽപാലം തകർന്നുവീണു; ഒഴിവായത്​ വൻദുരന്തം, ആഘാതത്തിൽ സമീപത്തെ രണ്ടുവീടുകൾക്ക് വിള്ളൽ

ആലപ്പുഴ: ബീച്ചിൽ നിർമാണത്തിലിരുന്ന ആലപ്പുഴ രണ്ടാംബൈപാസ്​ മേൽപാലത്തിന്‍റെ നാല്​ കൂറ്റൻ ഗർഡറുകൾ തകർന്നുവീണു. വൻദുരന്തം ഒഴിവായത്​ തലനാരിഴക്ക്​. തിങ്കളാഴ്ച രാവിലെ 10.50ന്​ ആലപ്പുഴ ബീച്ചിലെ വിജയ്​ പാർക്കിന്​ സമീപമായിരുന്നു സംഭവം. ആഘാതത്തിൽ സമീപത്തെ രണ്ട്​ വീടുകളുടെ ഭിത്തിയിൽ​ വിള്ളൽവീണു. ബീച്ച്​ റോഡിലെ മെൽവിൻ ​ഡ്രിക്യൂസ്, ടോണി കുരിശിങ്കൽ​ എന്നിവരുടെ ഇരുനില വീടുകൾക്കാണ്​ നാശമുണ്ടായത്​.

ദേശീയപാത വികസനത്തിന്‍റെ ഭാഗമായി നിർമാണത്തിലുള്ള എലിവേറ്റഡ്​ ഹൈവേയുടെ ഭാഗമായ മേൽപാലത്തിന്റെ 17നും 18നും ഇടയിലുള്ള തൂണിൽ ഏഴുദിവസം മുമ്പ്​ സ്ഥാപിച്ച ഗർഡറുകളാണ്​ പൂർണമായും നിലം​പൊത്തിയത്​. ഈസമയം മൂന്ന്​ തൊഴിലാളികൾ ജോലിയിലുണ്ടായിരുന്നു. രണ്ടുപേർ തകർന്ന​ ഗർഡറുകളുടെ സമീപത്തെ പില്ലറിൽ കമ്പികെട്ടുന്ന ജോലിയിലും മറ്റൊരാൾ താഴെയുമാണ്​ നിന്നിരുന്നത്​.

ശബ്​ദംകേട്ട്​ ഒരാൾ ഓടിമാറിയ​പ്പോൾ മുകളിലുണ്ടായിരുന്നവരെ പീന്നീട്​ കരാർ കമ്പനിയുടെ ഉദ്യോഗസ്ഥരെത്തി എക്​സ്​കവേറ്റർ ഉപയോഗിച്ച്​ താഴെയിറക്കി. വൻശബ്​ദത്തോടെയാണ്​ തൊഴിലാളികൾ താമസിക്കുന്ന താൽക്കാലിക ഷെഡിന്​ മുകളിലേക്ക്​ ഗർഡറുകൾ വീണതെന്ന്​ ദൃക്‌സാക്ഷികൾ പറഞ്ഞു.

ഈസമയം ഷെഡിൽ ആളില്ലായിരുന്നു. ഷെഡിൽ താമസിച്ചിരുന്ന അന്തർസംസ്ഥാന തൊഴിലാളികൾ രാവിലെ ഭക്ഷണം കഴിച്ച് തിരികെ ജോലിക്ക് മടങ്ങിയശേഷമായിരുന്നു അപകടം. തകർന്ന ഗർഡറുകൾ കരാർ കമ്പനി ജീവനക്കാരുടെ നേതൃത്വത്തിൽ ഉയർത്തിമാറ്റാൻ ശ്രമിച്ചെങ്കിലും സ്ഥലത്തെത്തിയ​ കോൺഗ്രസ്​ നേതാക്കൾ തൊഴിലാളികളെ തടഞ്ഞു.