വനം വകുപ്പ്​: ഒഴിവുകളുടെ റിപ്പോർട്ട്​ തേടി വനം മന്ത്രി

കോട്ടയം: വനം വകുപ്പിൽ പി.എസ്​.സിക്കു വിട്ട തസ്​തികകളിൽ നിലവിലുള്ള ഒഴിവുകളുടെ റിപ്പോർട്ട്​ തേടി വനം മന്ത്രി എ.കെ. ശശീന്ദ്രൻ. ഒരാഴ്ചക്കകം വിശദ റിപ്പോർട്ട്​ നൽകാനാണ്​ ആവശ്യപ്പെട്ടിരിക്കുന്നത്​. ​ഫോറസ്​റ്റ്​ റിസർവ് വാച്ചർ/ഡിപ്പോ വാച്ചർ പി.എസ്​.സി റാങ്ക് ഹോൾഡേഴ്സ്​ അസോസിയേഷൻ നിവേദനം നൽകിയതിനെ തുടർന്നാണ്​ നടപടി.

2018 ഡിസംബർ 21ന്​​ നിലവിൽവന്ന റാങ്ക്​ ലിസ്​റ്റിന്​ ഏഴുമാസം കൂടിയേ കാലാവധിയുള്ളൂ. 3638 പേരുൾപ്പെട്ട ലിസ്​റ്റിൽനിന്ന്​ ഇതുവ​രെ നിയമനം ലഭിച്ചത്​ 141 പേർക്ക്​ മാത്രമാണ്​. ഒഴിവുകളില്ലെന്നു പറയു​മ്പാഴും സംസ്ഥാനത്തൊട്ടാകെ നിരവധി താൽകാലിക വാച്ചർമാർ ജോലി ചെയ്യുന്നുണ്ട്​. 2019ൽ 2351 താൽക്കാലിക വാച്ചർമാരാണ്​ സ്ഥിരപ്പെടുത്തണമെന്ന്​ ആവശ്യപ്പെട്ട്​ ഹൈകോടതിയിൽ ഹരജി നൽകിയത്​.

റാങ്ക്​ലിസ്​റ്റിൽ ഉൾപ്പെട്ട്​ നിയമനം കാത്ത്​ വലിയൊരു വിഭാഗം പുറത്തിരിക്കു​മ്പോഴാണ്​ ഈ അവസ്ഥ. നിയമനം ആവശ്യപ്പെട്ട്​ ഉദ്യോഗാർഥികൾ ഓൺലൈനിൽ നടത്തുന്ന സമരം 100 ദിവസം പിന്നിട്ടു. സെക്ര​ട്ടേറിയറ്റിനു​ മുന്നിൽ നടത്തിയിരുന്ന സമരം കോവിഡ്​ സാഹചര്യത്തിൽ ഓൺലൈനിൽ ആക്കുകയായിരുന്നു.