നാല്​ കോവിഡ്​ രോഗികൾ പി.പി.ഇ കിറ്റില്ലാതെ എത്തി വോട്ടുചെയ്​തു

അടിമാലി: കോവിഡ് പ്രോ​ട്ടോകോൾ ലംഘിച്ച് അടിമാലിയില്‍ കുടുംബത്തിലെ നാലുപേര്‍ വോട്ടുചെയ്തു. അടിമാലി വിവേകാനന്ദ പബ്ലിക് സ്‌കൂളിലെ പോളിങ്​ സ്‌റ്റേഷനിലാണ് സംഭവം.

അടിമാലിയിലെ താലൂക്ക്​തല സഹകരണ സ്ഥാപനത്തിലെ ജീവനക്കാരിയും ഇവരുടെ അമ്മയും കൂടാതെ മറ്റൊരു വീട്ടിലെ ബന്ധുക്കളായ രണ്ടുപേരുമാണ് കോവിഡ്​ രോഗികളായിട്ടും പി.പി.ഇ കിറ്റ് ധരിക്കാതെയെത്തി വോട്ട​ു​ചെയ്​തത്​.

വിഷയം ശ്രദ്ധയിൽപെട്ടിട്ടും പോളിങ്​ ഉദ്യോഗസ്ഥർ ഇവരെ തടഞ്ഞില്ലെന്നും ഒത്താശ ചെയ്​തെന്നും പറയുന്നു. വൈകീട്ട് അഞ്ചിനുശേഷം പി.പി.ഇ കിറ്റ്​ ധരിച്ച്​ എത്തി വോട്ട് രേഖപ്പെടുത്താനായിരുന്നു അനുമതി.

പോസ്​റ്റല്‍ വോട്ട് രേഖപ്പെടുത്താൻ അവസരമുണ്ടായിരുന്നതും ഉപയോഗപ്പെടുത്താതെയാണ്​ ഇവർ ബൂത്തിൽ നേരി​ട്ടെത്തി സമ്മതിദാനം വിനിയോഗിച്ചത്​. കോവിഡ് രോഗികൾ മുൻകരുതലെടുക്കാതെ പല ബൂത്തിലും വോട്ടുചെയ്​തതായും സംശയിക്കുന്നു.