വിടപറഞ്ഞത്​ നിസ്വാർഥ സേവകൻ -ഗൾഫാർ

പ്രൊഫസർ സിദ്ദീഖ്​ ഹസൻ സാഹിബിന്‍റെ നിര്യാണ വാർത്ത അതീവ ദുഖത്തോടെയാണ്​ കേട്ടത്​. ഞങ്ങൾ തമ്മിൽ വർഷങ്ങളായുള്ള ബന്ധമുണ്ട്​. 'മാധ്യമം' പത്രത്തിന്‍റെ സ്ഥാപകകാലത്ത്​ പ്രസുമായി ബന്ധപ്പെട്ടുള്ള കാര്യങ്ങൾക്കായാണ്​ ഞങ്ങൾ ആദ്യമായി പരിചയപ്പെടുന്നത്​. പിന്നീട്​ അടുത്ത്​ ബന്ധം പുലർത്തുകയും പല പൊതുപ്രവർത്തനങ്ങളിലും ഒരുമിച്ച്​ സഹകരിക്കുകയും ചെയ്​തു. അദ്ദേഹത്തോ​ടുള്ള ബഹുമാനവും കടപ്പാടും അറിയിക്കുന്നു.

നിസ്വാർഥ സേവകനായിരുന്നു അദ്ദേഹം. പ്രവർത്തനങ്ങളിൽ ഒരിക്കലും സ്വന്തം താൽപര്യങ്ങൾ കലർന്നിരുന്നില്ല. അദ്ദേഹം പ്രതിനിധാനം ചെയ്​ത സംഘടനക്കായി അദ്ദേഹത്തിന്‍റെ ആത്മാർഥ പ്രവർത്തനവും നേതൃത്വവും ഉണ്ടായിരുന്നു. മികച്ച സംഘടാനപാടവുമുള്ള അദ്ദേഹം മറ്റുള്ളവർക്ക്​ പ്രചോദനമാകുകയും എല്ലാവരെയും കൂടെകൂട്ടുകയും ചെയ്​തിരുന്നു.

വിഷൻ 2016ന്‍റെ ഭാഗമായി അദ്ദേഹത്തോടൊപ്പം ഡൽഹിയിൽ യോഗത്തിൽ ഞാനും പ​ങ്കെടുത്തിരുന്നു. ഞാൻ കോഴിക്കോട്​ വരു​േമ്പാഴും അദ്ദേഹം മസ്​കത്തിൽ വരു​േമ്പാഴും ഞങ്ങൾ സൗഹൃദബന്ധം പുതുക്കിയിരുന്നു. 'സൗഹൃദവേദിക്കായി' ഞങ്ങൾ ഒരുമിച്ചു പ്രവർത്തിച്ചിരുന്നു. അദ്ദേഹം ഊർജ്ജസ്വലനായി എല്ലാ കാര്യങ്ങളിലും സജീവമായിരുന്നു. എല്ലാവിഭാഗം ജനങ്ങളു​മായും അദ്ദേഹം ആരോഗ്യകരമായ സംവാദം നടത്തി. 'സൗഹൃദവേദി'യിൽ നിന്നും ഉരുത്തിരിഞ്ഞ ആശയമായിരുന്നു അദ്ദേഹം വിഭാവനം ​ചെയ്​ത സാഫി ഇൻസ്റ്റിറ്റ്യൂട്ട്​. ഞാനും പ്രൊഫ. ജലീൽ സാഹിബും ബാവ സാഹിബും അടക്കമുള്ളവർ അദ്ദേഹത്തിന്‍റെ ആശയം ഉൾകൊണ്ട്​ അതിനായി പ്രവർത്തിച്ചു. അതൊരു വലിയ പ്രസ്ഥാനമായി ഇന്നും നടക്കുന്നു.

സിദ്ദീഖ്​ ഹസൻ സാഹിബിന്‍റെ ഉൾക്കാഴ്ചയും കാഴ്ചപ്പാടും അതേ അളവിൽ ഏറ്റെടുത്ത്​ ​ആർജവത്തേതാടെ മുന്നോട്ട്​ കൊണ്ടുപോകണമെന്ന്​ അദ്ദേഹത്തിന്‍റെ സഹപ്രവർത്തകേരാടും കുടുംബത്തോടും അഭ്യർഥിക്കുന്നു.