ദീർഘദൂര ട്രെയിനുകളിലെ ജനറൽ കോച്ചുകൾ പുനഃസ്ഥാപിച്ചില്ല

തിരുവനന്തപുരം: ദീർഘദൂര ട്രെയിനുകളിലെ ജനറൽ കോച്ചുകൾ പുനഃസ്ഥാപിക്കാതെ റെയിൽവേയുടെ ഒളിച്ചുകളി. മറ്റ് സോണുകളിൽ ഈ സൗകര്യം ഏർപ്പെടുത്തിയിട്ടും കേരളത്തിൽ നിന്നുള്ളതും കേരളത്തിലേക്കുള്ളതുമായ ദീർഘദൂര ട്രെയിനുകളിൽ ഈ സൗകര്യം നീളുകയാണ്.

ജൂൺ 30 മുതൽ ലഭ്യമാകുമെന്നാണ് നേരത്തെ റെയിൽവേ വ്യക്തമാക്കിയിരുന്നത്. ദക്ഷിണ റെയിൽവേയിൽ നേരത്തെ എല്ലാ ട്രെയിനിലും ജനറൽ ടിക്കറ്റെടുത്ത ശേഷം സ്ലീപ്പർ കോച്ചിൽ ഒഴിവുണ്ടെങ്കിൽ അധിക ചാർജ് നൽകി യാത്ര ചെയ്യാമായിരുന്നു. എന്നാൽ ജനറൽ കോച്ചുകൾ ആരംഭിക്കാത്തതിനാൽ ഈ സൗകര്യം ഇപ്പോൾ ലഭ്യമാകുന്നില്ല. ദീർഘദൂര ട്രെയിനുകളിൽ റിസർവ് ചെയ്തവർക്ക് മാത്രമേ കയറാനാകൂ.

കേരളത്തിലെത്തുമ്പോൾ ഈ ട്രെയിനുകളിലെ കോച്ചുകൾ മിക്കവയും കാലിയായാണ് ഓടുന്നത്. ജനറൽ കോച്ചില്ലെന്ന കാര്യം മനസ്സിലാക്കാതെ ഒഴിവുള്ള സ്ലീപ്പർ സീറ്റ് ലക്ഷ്യമിട്ട് ജനറൽ ടിക്കറ്റെടുത്ത് കയറുന്ന യാത്രക്കാർ 'അനധികൃത യാത്ര'യുടെ പേരിൽ വലിയ പിഴയടക്കാൻ നിർബന്ധിതമാവുകയാണ്.

സീസൺ ടിക്കറ്റുകാർക്കും ഈ ട്രെയിനുകളിൽ കയറാനാവില്ല. ജൂലൈ മധ്യത്തോടെ ഈ സൗകര്യം ലഭ്യമാകുമെന്നാണ് ദക്ഷിണ റെയിൽവേ അധികൃതർ വ്യക്തമാക്കുന്നത്. പ്രതിദിന ട്രെയിനുകളിൽ സൗകര്യം ഏർപ്പെടുത്തിയിട്ടുണ്ടെന്നും അവർ പറയുന്നു.ഹിമസാഗർ എക്സ്പ്രസ്, നേത്രാവതി, കേരള എക്സ്പ്രസ്, മംഗള എക്സ്പ്രസ്, വിവേക് എക്സ്പ്രസ് തുടങ്ങിയവയിലാണ് ജനറൽ കോച്ചുകൾ തിരികെയെത്താനുള്ളത്.