ബി.എസ്​.എൻ.എല്ലിന്​ നല്ല കാലം; ഒരു മാസത്തിനിടെ ഒരു ലക്ഷം പുതിയ ഉപഭോക്താക്കൾ

കൊച്ചി‌: സ്വകാര്യ ടെലികോം കമ്പനികൾ നിരക്ക് വർധിപ്പിച്ചതോടെ ബി.എസ്.എൻ.എൽ​ കണക്ഷന്​ ആവശ്യക്കാർ ഏറുന്നു. ഒരു മാസത്തിനിടെ കേരളത്തിൽ ഒരു ലക്ഷത്തോളം പുതിയ ഉപഭോക്താക്കളെ നേടാൻ ബി.എസ്​.എൻ.എല്ലിന്​ കഴിഞ്ഞതായി​ കണക്കുകൾ വ്യക്തമാക്കുന്നു. 10​ ദിവസത്തിനിടെ സംസ്ഥാനത്ത് 29,511 പുതിയ ഉപഭോക്താക്കൾ ബി.എസ്​.എൻ.എല്ലിൽ​ എത്തി​.

പ്രതിദിനം മൂവായിരത്തിലധികം പുതിയ ഉപഭോക്താക്കളും എത്തുന്നു. സ്വാകാര്യ കമ്പനികൾ നിരക്ക് വർധിപ്പിച്ചതിനുപുറമെ ബി.എസ്.എൻ.എല്ലിന്‍റെ ഫോർ -ജി സംവിധാനം കൂടുതൽ ശക്തിപ്പെടുത്തിയതും​ കൂടുതൽ ഉപഭോക്താക്കൾ എത്താൻ കാരണമായതായി​ ബി.എസ്​.എൻ.എൽ അധികൃതർ പറയുന്നു​​.

പുതിയ ഉപഭോക്താക്കളിൽ 13,858 പേർ പോർട്ടിങ്​ സംവിധാനം വഴിയാണ് എത്തിയത്. ജൂലൈയിൽ മാത്രം 91,479 പേർ ബി.എസ്.എൻ.എൽ കസ്റ്റമറായി മാറിയിരുന്നു. ഇതിൽ 34,466 പേർ സിം പോർട്ട് ചെയ്തവരാണ്​. കേരളത്തില്‍ 5-ജി സേവനം 2025ഓടെ ലഭ്യമാക്കുമെന്ന്​ ബി.എസ്.എൻ.എൽ മാർക്കറ്റിങ്​ പ്രിൻസിപ്പൽ ജനറൽ മാനേജർ കെ. സാജു ജോർജ് ‘മാധ്യമ’ ത്തോട്​ പറഞ്ഞു.

ആദിവാസി മേഖലകളിൽ കൂടുതൽ ടവറുകൾ

ഇടുക്കി, വയനാട് ജില്ലകളിലെ വിദൂര ആദിവാസി മേഖലകളിലുൾപ്പെടെ 367 ടവർ സ്ഥാപിക്കാനുള്ള നടപടികളും ബി.എസ്​.എൻ.എൽ ആവിഷ്കരിച്ചിട്ടുണ്ട്​. ഇതിൽ 62 എണ്ണം പൂർത്തിയായി ബി.എസ്.എൻ.എൽ വൃത്തങ്ങൾ പറയുന്നു.

അതിവേഗ ഇന്‍റർനെറ്റ്​ സൗകര്യം നൽകാൻ സാധിക്കാത്തതിനെ തുടർന്ന്​ ബി.എസ്​.എൻ.എല്ലിൽനിന്ന്​ ഉപഭോക്താക്കൾ അകന്നുപോയിരുന്നു. ഇവരെ പിടിച്ചു നിർത്തുക എന്ന ലക്ഷ്യത്തിലാണ്​ കൂടുതൽ പദ്ധതികൾ ആവിഷ്കരിക്കുന്നത്​​.

നിലവിൽ 7000 ടവറാണ് സംസ്ഥാനത്ത് ബി.എസ്​.എൻ.എല്ലിനുള്ളത്. അടുത്ത മാർച്ചോടെ 500 ടവർകൂടി സ്ഥാപിക്കുമെന്ന്​ അധികൃതർ പറഞ്ഞു. ഉപഭോക്താക്കളുടെ എണ്ണം കൂട്ടാന്‍ എക്സ്ചേഞ്ച് വഴിയും ഷോപ്പുകൾ വഴിയും സിം ലഭ്യമാക്കാനുള്ള കാമ്പയിനുകൾ ജില്ലതോറും തുടങ്ങിയിട്ടുണ്ട്​. പോർട്ടിങ്ങിനും പുതിയ കണക്ഷൻ നേടുന്നതിനുമുള്ള സംവിധാനങ്ങൾ ഒരുക്കുന്ന നടപടികളും ആരംഭിച്ചിട്ടുണ്ട്​. അടുത്ത വർഷം ആദ്യം തന്നെ 5-ജി സേവനംകൂടി ലഭ്യമാക്കി മറ്റ് സേവന ദാതാക്കളുമായി മത്സരത്തിന്​ തയാറെടുക്കുകയാണ്​ ബി.എസ്​.എൻ.എൽ.