സിദ്ധാർഥന്‍റെ കുടുംബത്തിന്​ സർക്കാർ സഹായം നൽകുന്നില്ലെന്ന് ആക്ഷേപം

തിരുവനന്തപുരം: പൂക്കോട് വെറ്ററിനറി സർവകലാശാല ഹോസ്റ്റലിൽ റാഗിങ്ങിനെ തുടർന്ന് ദുരൂഹസാഹചര്യത്തിൽ മരിച്ച വിദ്യാർഥി ജെ.എസ്. സിദ്ധാർഥന്‍റെ കുടുംബത്തിന്​ സർക്കാർ സഹായം നൽകുന്നില്ലെന്ന്​ ആക്ഷേപം. ഏഴുമാസം പിന്നിട്ടിട്ടും മരണത്തിന് ഉത്തരവാദികൾ എന്ന പേരിൽ ഏതാനും വിദ്യാർഥികളെയും ഡീൻ, വാർഡൻ എന്നിവരെയും കോളജിൽ നിന്ന്​ പുറത്താക്കി എന്നതൊഴിച്ചാൽ കുടുംബത്തെ സഹായിക്കാൻ സർക്കാറോ സർവകലാശാലയോ ഇതുവരെ തയാറായിട്ടില്ല.

സിദ്ധാർഥന്റെ വസ്ത്രങ്ങൾ, കണ്ണട, ഉപയോഗിച്ചിരുന്ന പുസ്തകങ്ങൾ എന്നിവ പോലും മാതാപിതാക്കൾക്ക് കൈമാറാതെ സർവകലാശാല അധികൃതർ നഷ്ടപ്പെടുത്തിയതായി പരാതിയുണ്ട്​.

സിദ്ധാർഥന്റെ സഹോദരന്‍റെ തുടർപഠന ചെലവിനുള്ള സാമ്പത്തിക സഹായം നൽകാൻ വെറ്ററിനറി സർവകലാശാലക്ക്​ നിർദേശം നൽകണമെന്നാവശ്യപ്പെട്ട്​ സേവ് യൂനിവേഴ്സിറ്റി കാമ്പയിൻ കമ്മിറ്റി ഗവർണർക്കും മുഖ്യമന്ത്രിക്കും മൃഗസംരക്ഷണമന്ത്രിക്കും നിവേദനം നൽകി.