ഹേമ കമീഷൻ റിപ്പോർട്ട്​ ചർച്ച ചെയ്യാൻ സിനിമ കോൺക്ലേവ്​ നടത്തുമെന്ന്

ആലപ്പുഴ: എല്ലാ മേഖലയിലും പ്രബല വിഭാഗമുണ്ടെന്നും അവർക്കെതിരെ പരാതി നൽകിയാൽ കർശന നടപടിയുണ്ടാകുമെന്നും മന്ത്രി സജി ചെറിയാൻ. ഹേമ കമീഷൻ റിപ്പോർട്ട്​ പുറത്തുവന്നശേഷം മാധ്യമപ്രവർത്തകരോട്​ പ്രതികരിക്കുകയായിരുന്നു അദ്ദേഹം.

ഹേമ കമീഷൻ റിപ്പോർട്ട്​ ചർച്ച ചെയ്യാൻ രണ്ടുമാസത്തിനുള്ളിൽ സിനിമ കോൺക്ലേവ്​ നടത്തും. മേഖലയിലെ പ്രശ്​നങ്ങൾ പഠിക്കാനാണ്​ സർക്കാർ കമീഷനെ നിയോഗിച്ചത്​. സീരിയൽ-സിനിമ രംഗത്തെ എല്ലാവരുമായും ചർച്ച നടത്തും. എന്തെല്ലാം ചെയ്യാൻ പറ്റുമെന്ന നിലപാടാണ്​ സർക്കാറിനുള്ളത്​. റിപ്പോർട്ട് പ്രസിദ്ധീകരിക്കേണ്ടെന്ന്​ പറഞ്ഞത്​ മുൻ വിവരാവകാശ കമീഷനാണ്​.

മൊഴിയെടുത്തപ്പോൾ ഹേമ കമീഷൻ ഞെട്ടിയോയെന്ന്​ എനിക്കറിയില്ല. ​റിപ്പോർട്ടിലുള്ളത്​ ഞെട്ടിക്കുന്ന വിവരങ്ങളാണ​ല്ലോയെന്ന ചോദ്യത്തോട്​ പ്രതികരിക്കുകയായിരുന്നു മന്ത്രി. ഞെട്ടലുണ്ടായ സംഭവം ശ്രദ്ധയിൽപെടുത്തിയാൽ നോക്കാം. മന്ത്രിയായി മൂന്നരവർഷത്തിനിടെ​ ഒരു നടിയുടെയും പരാതി തനിക്ക്​ കിട്ടിയിട്ടില്ല. ഡബ്ല്യു.സി.സി അടക്കം ചില സംഘടനകളുടെ പരാതികൾ കിട്ടിയിട്ടുണ്ട്. സ്ത്രീസുരക്ഷക്ക്​ സർക്കാർ വലിയ പ്രാധാന്യം നൽകുന്നുണ്ടെന്നും അദ്ദേഹം പറഞ്ഞു.