ജി.എസ്.ടി: ഒന്നാംദിനം ചെക്ക്​പോസ്​റ്റുകൾ ‘ഓക്കെ’

പാലക്കാട്: ചരക്ക്​ സേവന നികുതി (ജി.എസ്.ടി)യുടെ ആദ്യദിനം ദക്ഷിണേന്ത്യയിലെ ഏറ്റവും വലിയ ചെക്ക്​പോസ്​റ്റായ വാളയാറിൽ ആശയക്കുഴപ്പമൊന്നുമുണ്ടായില്ലെന്ന് ജീവനക്കാർ. ശനിയാഴ്ച അർധരാത്രി 12 മുതൽ രാവിലെ ആറുവരെ 448 വാഹനങ്ങളും രാവിലെ ആറ്​ മുതൽ ഉച്ചക്ക് രണ്ടുവരെ 358 വാഹനങ്ങളും ചെക്ക്​പോസ്​റ്റ് കടന്നു. ഏകദേശം 800ഓളം വാഹനങ്ങൾ പതിവുപോലെ ചെക്ക്​പോസ്​റ്റ് കടന്നുപോയി. ലോറി ഡ്രൈവർമാർ നൽകുന്ന ഡിക്ലറേഷൻ സ്വീകരിക്കുന്ന ജോലി മാത്രമാണ് ചെക്ക്​പോസ്​റ്റിലുണ്ടായിരുന്നത്. ജി.എസ്.ടി നടപടി സുഗമമാണെന്ന് ഉദ്യോഗസ്ഥരും ഡ്രൈവർമാരും അഭിപ്രായപ്പെട്ടു. ഡിക്ലറേഷൻ പരിശോധിക്കാൻ മൂന്ന്​ കേന്ദ്രങ്ങളാണ് ചെക്ക്​പോസ്​റ്റിൽ പ്രവർത്തിക്കുന്നത്. കൃത്യമായ രേഖകളുമായി എത്തുന്ന വാഹനങ്ങൾ കടത്തിവിടാൻ സെക്കൻഡുകൾ സമയം മതി. ഡിക്ലറേഷൻ പരിശോധിക്കേണ്ടതിനാൽ നിലവിലെ ജീവനക്കാർ ചെക്ക്​പോസ്​റ്റിൽ തുടരും. ആറ്​ മാസത്തിന് ശേഷമേ ഇവരെ പുനർവിന്യസിക്കേണ്ട കാര്യത്തിൽ തീരുമാനമാകൂ. 

സ്ക്വാഡുകളുടെ പ്രവർത്തനം ശക്തിപ്പെടുത്താൻ ദേശീയപാതകളിലും ഇടറോഡുകളിലും കാമറകൾ സ്ഥാപിക്കും. മാർബിൾ, ഗ്രാനൈറ്റ്, കമ്പി തുടങ്ങിയവക്ക് ചെക്ക്​പോസ്​റ്റിൽനിന്ന് നേരിട്ട് നികുതി സ്വീകരിച്ചിരുന്ന സമ്പ്രദായവും അവസാനിച്ചു. രേഖകൾ കൃത്യമല്ലാത്ത ചരക്കുവാഹനങ്ങളിൽനിന്ന് ഈടാക്കിയിരുന്ന സെക്യൂരിറ്റി ഡെപ്പോസിറ്റ് ഇനി മുതൽ സ്ക്വാഡുകൾ സ്വീകരിക്കും. ഇ^​െചലാൻ തയാറാകുന്നതുവരെ രശീതി എഴുതിനൽകുന്ന രീതി തുടരും. എക്സൈസ് വകുപ്പിനാകും ഇനി വാളയാർ ചെക്ക്​പോസ്​റ്റി​​​െൻറ ചുമതല.
നിലമ്പൂർ വഴിക്കടവ് വാണിജ‍്യനികുതി ചെക്ക്​പോസ്​റ്റിലൂടെ തടസ്സങ്ങളില്ലാതെ വാഹനങ്ങൾ കടന്നുപോയി. എന്നാൽ, ചരക്ക് ലോറികളുടെ എണ്ണത്തിൽ കുറവനുഭവപ്പെട്ടു. നാടുകാണി വഴിയുള്ള ചരക്ക് ഇറക്കുമതിയിൽ 40 ശതമാനത്തി‍​​െൻറ കുറവാണ് ശനിയാഴ്ച അനുഭവപ്പെട്ടത്. മാർബിൾ, ഗ്രാ​ൈനറ്റ് ഇറക്കുമതിയിലാണിത്. ചരക്ക് ഇറക്കുമതിയിലെ നികുതിവെട്ടിപ്പ് തടയാൻ ജില്ലകൾ തോറും വാണിജ‍്യനികുതി ഇൻറലിജൻസ് സ്ക്വാഡ്​ പ്രവർത്തനം ശക്തിപ്പെടുത്തും. മലപ്പുറം ജില്ലയിൽ ആറ് സ്​റ്റേറ്റ് ടാക്സ് സ്ക്വാഡും നാല് സെൻട്രൽ ടാക്സ് സ്ക്വാഡും രൂപവത്​കരിക്കാനാണ് നീക്കം. 
തമിഴ്​നാട്ടിൽ അതിർത്തിപ്രദേശങ്ങളിലെ വിൽപന നികുതി ചെക്ക്​പോസ്​റ്റുകൾ നിർത്തലാക്കി. കോയമ്പത്തൂർ മേഖലയിലെ വാളയാർ, കെ.ജി ചാവടി, പിച്ചന്നൂർ, മീനാക്ഷിപുരം, ഗോപാലപുരം, ഗൂഡല്ലൂർ എന്നിവയാണ്​ വെള്ളിയാഴ്​ച അർധരാത്രിയോടെ അടച്ചുപൂട്ടിയത്​. 
തിരുവള്ളൂർ ജില്ലയിലെ ഉൗത്തുക്കോട്ട, കടലൂർ ജില്ലയിലെ ആൽപേട്ട, കൃഷ്​ണഗിരി ജില്ലയിലെ ഒസൂർ ജുജുവാഡി ചെക്ക്​പോസ്​റ്റുകളും പ്രവർത്തനം അവസാനിപ്പിച്ചു. അതിർത്തികളിലെ വനം,- പൊലീസ്​ ചെക്ക്​പോസ്​റ്റുകൾ സാധാരണപോലെ പ്രവർത്തിക്കുമെങ്കിലും തിരക്ക്​ കുറവാണ്​.