ഹജ്ജ്​ ക്വാട്ട പ്രഖ്യാപിച്ചു: കേരളത്തിൽനിന്ന്​ 5747 പേർക്ക്​ അവസരം, നറുക്കെടുപ്പ്​ ഉടൻ

കരിപ്പൂർ: കേന്ദ്ര ഹജ്ജ്​ കമ്മിറ്റി ഈ വർഷത്തെ ഹജ്ജ്​ ക്വോട്ട പ്രഖ്യാപിച്ചു. സംസ്ഥാനത്തുനിന്ന്​ 5747 പേർക്കാണ്​ അവസരം. കേന്ദ്ര ഹജ്ജ് കമ്മിറ്റി വഴി 56,601 സീറ്റ് ലഭിച്ചതിൽ 55,164 സീറ്റാണ്​ വിവിധ സംസ്ഥാനങ്ങൾക്കായി വീതിച്ചുനൽകിയത്​. ഇതിൽനിന്നാണ്​ സംസ്ഥാനത്തിന്​​ 5747 ക്വാട്ട ലഭിച്ചത്​.

മറ്റു​ സംസ്ഥാനങ്ങളിൽനിന്ന് ഒഴിവുവരുന്ന സീറ്റുകളുംകൂടി ലഭിച്ചാൽ കേരളത്തിൽനിന്ന്​ കൂടുതൽ പേർക്ക് അവസരം ലഭിച്ചേക്കാം. ഏപ്രിൽ 26നും 30നും ഇടയിലായി​ നറുക്കെടുപ്പിലൂടെ തീർഥാടകരെ തെരഞ്ഞെടുക്കും. 12,806 പേരാണ്​ ഇക്കുറി സംസ്ഥാനത്തുനിന്ന്​ അപേക്ഷ നൽകിയിരുന്നത്​.

എന്നാൽ, 65 വയസ്സിന്​ മുകളിലുള്ളവർക്ക്​ സൗദി അറേബ്യ അയോഗ്യത ഏർപ്പെടുത്തിയതോടെ 2000ത്തോളം പേർക്ക്​ അവസരം നഷ്ടമായി​. ഇതിനു​ പകരം പുതുതായി അപേക്ഷ ക്ഷണിച്ചിരുന്നു. ഇതിന്‍റെ സമയപരിധി വെള്ളിയാഴ്ച അവസാനിച്ചു. ഇതിൽ പുതുതായി 250ഓളം അപേക്ഷ ലഭിച്ചു​. ഇക്കുറി 12,000ത്തോളം അപേക്ഷകളുണ്ടാകുമെന്ന്​​ ഹജ്ജ്​ കമ്മിറ്റി അധികൃതർ അറിയിച്ചു. കൃത്യമായ കണക്ക്​ ലഭ്യമായിട്ടില്ലെന്നും അവർ വ്യക്തമാക്കി.

നറുക്കെടുപ്പിനു ശേഷം തെരഞ്ഞെടുക്കപ്പെടുന്നവർ പാസ്​​പോർട്ടും മുഴുവൻ പണവും നൽകണം. ഓരോ കവറിലും അടക്കേണ്ട തുക നറുക്കെടുപ്പിനു​ ശേഷം ഹജ്ജ് കമ്മിറ്റി വെബ്‌സൈറ്റിൽ ലഭ്യമാവുമെന്നും കൃത്യമായ തീയതി പിന്നീട് അറിയിക്കുമെന്നും അധികൃതർ അറിയിച്ചു.

2019ന്​ ശേഷം ഈ വർഷമാണ്​ ഇന്ത്യയിൽനിന്ന്​ ഹജ്ജ്​ തീർഥാടനത്തിന്​ അവസരം ലഭിക്കുന്നത്​. കഴിഞ്ഞ രണ്ടു വർഷവും കോവിഡ്​ പശ്ചാത്തലത്തിൽ വി​ദേശ തീർഥാടകരെ സൗദി അനുവദിച്ചില്ല. ഇക്കുറി കർശന മാനദണ്ഡങ്ങൾ പ്രകാരമാണ്​ അനുമതി​.

സൗദി അംഗീകരിച്ച രണ്ട്​ ഡോസ്​ വാക്സിൻ എടുക്കണം, യാത്രക്ക്​ മുമ്പ്​ പി.സി.ആർ പരിശോധന വേണം. 65 വയസ്സിന്​ താഴെയുള്ളവർക്കാണ്​ അനുമതി​. ഹജ്ജിന്​ ഇന്ത്യയിൽനിന്ന്​ 79,237 പേർക്കാണ്​ ഇക്കുറി അനുമതിയുള്ളത്​. കേന്ദ്ര ഹജ്ജ്​ കമ്മിറ്റി ക്വാട്ടക്ക്​ ശേഷമുള്ളത്​ സ്വകാര്യ ​​ഗ്രൂപ്പുകൾക്കാണ്​ അനുവദിക്കുക.