സി.പി.എമ്മും സി.പി.​െഎയും അധികനാൾ ഒരുമിച്ച്​ പോകില്ല -ഹസൻ

കൊച്ചി: സി.പി.എമ്മിനും സി.പി.ഐക്കും ഇനി എത്രനാൾ ഒരുമിച്ച് പ്രവർത്തിക്കാൻ കഴിയുമെന്നതിൽ സംശയമുണ്ടെന്ന് കെ.പി.സി.സി പ്രസിഡൻറ് എം.എം. ഹസൻ വാർത്ത സമ്മേളനത്തിൽ പറഞ്ഞു. തോമസ് ചാണ്ടി വിഷയത്തിൽ പ്രധാന ഘടക കക്ഷിയായ സി.പി.ഐ കടുത്ത നിലപാടെടുത്തിട്ടും അഴിമതിക്കാരനെ സംരക്ഷിക്കുന്ന നിലപാടാണ്​ മുഖ്യമന്ത്രി പിണറായി വിജയൻ സ്വീകരിച്ചത്.

മന്ത്രിസഭയോഗത്തിൽനിന്ന് വിട്ടുനിന്ന സി.പി.ഐ നിലപാട്  അസാധാരണമാണെന്ന് മുഖ്യമന്ത്രിക്ക് പറയേണ്ടി വന്നു. സി.പി.ഐ മുഖപത്രത്തിൽ അസാധാരണ നടപടി അനിവാര്യമാക്കിയ അസാധാരണ സാഹചര്യത്തെക്കുറിച്ച് കാനം രാജേന്ദ്രൻ മുഖപ്രസംഗം എഴുതി. സി.പി.ഐയുടെ നിലപാടാണ് തോമസ്​ ചാണ്ടിയുടെ രാജി അനിവാര്യമാക്കിയത്. രാഷ്​ട്രീയ അടിത്തറ ഇളകിയ എൽ.ഡി.ഫ് പിരിച്ചു വിടണമെന്ന് എം.എം. ഹസൻ ആവശ്യപ്പെട്ടു. തോമസ് ചാണ്ടിക്കായി ഹൈകോടതിയില്‍ അഡ്വ. വിവേക് തന്‍ഖ ഹാജരായത് ഹൈകമാന്‍ഡിനെ അറിയിച്ചിട്ടുണ്ടെന്നും അദ്ദേഹം പറഞ്ഞു.