കൊണ്ടോട്ടിയിൽ വാക്‌സിനെടുക്കാൻ എത്തിയയാൾ ആരോഗ്യപ്രവർത്തകരെ മർദിച്ചു

കൊണ്ടോട്ടി (മലപ്പുറം): വാക്‌സിനെടുക്കാൻ എത്തിയയാൾ വനിത ജീവനക്കാരിയുൾപ്പെടെ മൂന്ന്​ ആരോഗ്യപ്രവർത്തകരെ മർദിച്ചു. പരി​ക്കേറ്റ ജെ.എച്ച്.ഐ രാജേഷ്, അറ്റൻഡർ കെ.സി. ശബരി ഗിരീഷ്, ജെ.പി.എച്ച്.എൻ പി.ടി. രമണി എന്നിവർ കൊണ്ടോട്ടി താലൂക്ക്​ ആശുപത്രിയിൽ ചികിത്സ തേടി.

നെടിയിരുപ്പ് ചിറയിൽ പ്രാഥമികാരോഗ്യ കേന്ദ്രത്തിൽ വ്യാഴാഴ്ച രാവിലെയായിരുന്നു അതിക്രമം. സംഭവത്തിൽ നെടിയിരുപ്പ് മേലേപറമ്പ് സ്വദേശി മുഹമ്മദലിക്കെതിരെ കരിപ്പൂർ പൊലീസ് കേസെടുത്തു. ജീവനക്കാരിൽ നിന്ന്​ മൊഴിയെടുത്തതായും കർശന നടപടിയെടുക്കുമെന്നും കരിപ്പൂർ ഇൻസ്‌പെക്ടർ ഷിബു പറഞ്ഞു.

പ്രാഥമികാരോഗ്യ കേന്ദ്രത്തിൽ രാവിലെ ഒമ്പത് മുതൽ വാക്സിൻ നൽകാനുള്ള നടപടി തുടങ്ങിയിരുന്നു. എന്നാൽ, സോഫ്റ്റ്്​വെയർ പ്രശ്നംമൂലം ഷെഡ്യൂൾ ലഭിക്കാൻ വൈകി. ഇതോടെ മുഹമ്മദലി ആരോഗ്യപ്രവർത്തകരോട് തട്ടിക്കയറുകയും അസഭ്യം പറയുകയും ചെയ്​തെന്നാണ്​ പരാതി.

ഡോക്ടറോട് തട്ടിക്കയറിയപ്പോൾ ഇടപെട്ടപ്പോഴാണ് മർദിച്ചതെന്ന് ജീവനക്കാർ പറഞ്ഞു. സ്ഥലത്തെത്തിയ മറ്റുരണ്ട്​ ജീവനക്കാർക്കു​ നേരെയും കൈയേറ്റശ്രമം ഉണ്ടായതായും പരാതിയുണ്ട്.