നേവിസിന്‍റെ ഹൃദയം പ്രേംചന്ദിന്‍റെ ശരീരത്തിൽ മിടിച്ചു തുടങ്ങി; നന്ദി മനുഷ്യരെ..

കോഴിക്കോട്​: മെട്രോമെഡ്​ ഇൻറർനാഷനൽ കാർഡിയാക്​ സെൻററിൽ ശനിയാഴ്​ച രാത്രി ഹൃദയം മാറ്റിവെക്കൽ ശസ്​ത്രക്രിയക്ക്​ വിധേയനായ പ്രേംചന്ദിന്‍റെ (59) ആരോഗ്യസ്​ഥിതി തൃപ്​തികരമാണെന്ന്​ മാനേജിങ്​ ഡയറക്​ടറും ചീഫ്​ കാർഡിയോളജിസ്​റ്റുമായ മുഹമ്മദ്​ മുസ്​തഫ അറിയിച്ചു. ആലുവ രാജഗിരി ആശുപത്രിയിൽ മസ്‌തിഷ്‌ക മരണം സംഭവിച്ച കോട്ടയം വടവത്തൂര്‍ കളത്തില്‍പടി ചിറത്തിലത്ത് ഏദന്‍സിലെ നേവിസിന്‍റെ (25) ഹൃദയമാണ്​ കണ്ണൂർ സ്വദേശിയായ പ്രേംചന്ദിന്​ മാറ്റിവെച്ചത്​.

രോഗിയുടെ ശരീരത്തിൽ പുതിയ ഹൃദയം പ്രവർത്തനം ആരംഭിക്കുകയും ബോധം തിരിച്ചുകിട്ടുകയും ചെയ്തതായി ഡോ. മുഹമ്മദ്​ മുസ്​തഫ പറഞ്ഞു. കാർഡിയോ തൊറാസിക്​ സർജറി ഡയറക്​ടറും ട്രാൻസ്​പ്ലാൻറ്​ സർജനുമായ പ്രഫ. ഡോ. വി. നന്ദകുമാർ, ഡോ. അശോക്​ ജയരാജ്​, ഡോ. ലക്ഷ്​മി, ഡോ. ലക്ഷ്​മി, ഡോ. വിനോദ്​ എന്നിവരടങ്ങുന്ന സംഘമാണ്​ ശസ്​ത്രക്രിയ നിർവഹിച്ചത്​. ആലുവയിൽനിന്നും റോഡ് മാർഗം ആംബുലൻസിൽ പൊലീസ് എസ്​കോർ​ട്ടോടുകൂടി മൂന്നുമണിക്കൂർ അഞ്ചു​ മിനിറ്റു കൊണ്ട് ഹൃദയം ഇവിടെ എത്തിക്കുവാൻ കഴിഞ്ഞത് ശസ്ത്രക്രിയയുടെ വിജയത്തിന് കാരണമായി.

ഫ്രാന്‍സില്‍ അക്കൗണ്ടിങ്​ മാസ്റ്ററിന് പഠിക്കുകയായിരുന്നു നേവിസ്. കോവിഡ് കാരണം വീട്ടിൽ ഓണ്‍ലൈനിലായിരുന്നു പഠനം. സെപ്റ്റംബർ 16നാണ് നേവിസിനെ വീട്ടിൽ അബോധാവസ്ഥയിൽ കണ്ടെത്തിയത്. മസ്തിഷ്ക മരണം സ്ഥിരീകരിച്ച നേവിസിന്‍റെ ഹൃദയം, കരള്‍, കൈകള്‍, രണ്ട് വൃക്കകള്‍, കണ്ണുകള്‍ എന്നിവയും ദാനം ചെയ്തിട്ടുണ്ട്. സാജന്‍ മാത്യുവും ഷെറിനുമാണ്​ നേവിസിന്‍റെ മാതാപിതാക്കൾ​.

Also Read:കേരളം വഴിയൊരുക്കി; കൊച്ചിയിൽ നിന്നും ഹൃദയം കോഴിക്കോട്ടെത്തിച്ചു