കൊച്ചിയിലെ ബസ്സപകടം: ഡ്രൈവർക്കെതിരെ കർശന നടപടിയെടുക്കണമെന്ന് ഹൈകോടതി

കൊച്ചി: റോഡിൽ ഇനിയൊരു ജീവൻ പൊലിയാതിരിക്കാൻ പൊലീസ്​ കർശന നടപടിയെടുക്കണമെന്ന്​ ഹൈകോടതി. ആളെ കൊന്നതിന്​​ നടപടിയെടുത്താൽ സമരം ചെയ്യുമെന്ന ഭീഷണി ആരെ പേടിപ്പിക്കാനാണെന്നും ഇത്തരം ഭീഷണികൾ അനുവദിക്കരുതെന്നും ജസ്റ്റിസ്​ ദേവൻ രാമചന്ദ്രൻ വ്യക്തമാക്കി. എറണാകുളം മാധവ ഫാർമസി ജങ്​ഷനിൽ വെള്ളിയാഴ്ച രാവിലെ ബൈക്ക് യാത്രക്കാരൻ സ്വകാര്യ ബസിനടിയിൽ​പെട്ടു മരിച്ച സംഭവത്തിൽ സ്വമേധയ പരിഗണിച്ച ഹരജിയിലാണ്​ ഹൈകോടതി ഇടപെടൽ​.

വെള്ളിയാഴ്ച രാവിലെ 8.15നു​ണ്ടായ അപകടത്തിൽ വൈപ്പിൻ കർത്തേടം കല്ലുവീട്ടിൽ ആന്റണിയാണ്​ മരിച്ചത്​. നഗരത്തിലെ റോഡുകളുടെ ശോച്യാവസ്ഥ പരിഹരിക്കണമെന്ന ഹരജികളിൽ ഹൈകോടതി നിയോഗിച്ച അമിക്കസ് ക്യൂറിയാണ് അപകടവിവരം ശ്രദ്ധയിൽപെടുത്തിയത്. തുടർന്ന് കൊച്ചി ഡി.സി.പി എസ്. ശശിധരൻ നേരിട്ട്​ ഹാജരാകാൻ കോടതി നിർദേശിച്ചു. അപകടത്തിന്റെ സി.സി ടി.വി ദൃശ്യം ​കണ്ട സിംഗിൾ ബെഞ്ച്​, ഉച്ചക്കുശേഷം കേസ് പരിഗണിച്ചപ്പോൾ അമിത വേഗത്തിൽ അശ്രദ്ധയോടെയാണ് ബസ് ഓടിച്ചതെന്ന് ദൃശ്യങ്ങളിൽ വ്യക്തമാണെന്ന്​ പറഞ്ഞു. ഡ്രൈവർക്കെതിരെ കർശന നടപടിയെടുക്കാൻ കോടതിയിൽ ഹാജരായിരുന്ന ഡി.സി.പിക്ക് നിർദേശവും നൽകി.

24 മണിക്കൂറിനകം നടപടികൾ തുടങ്ങണം. ട്രാഫിക് ഡ്യൂട്ടിയിലുള്ളവർ അമിതവേഗം നിയന്ത്രിക്കാൻ നടപടിയെടുക്കണം. റോഡിൽ കാൽനടക്കാർക്കാണ് മുൻഗണന. വലിയ വാഹനങ്ങൾക്ക്​ ഏറ്റവും അവസാന പരിഗണനയേയുള്ളൂ. സമയക്രമത്തിന്റെ പേരിൽ സ്വകാര്യ ബസുകൾക്ക് ഇതു ലംഘിക്കാനാവില്ല. അമിത വേഗത്തെക്കുറിച്ച് പരാതി ലഭിച്ചാൽ ഉടൻ നടപടി വേണമെന്നും കോടതി നിർദേശിച്ചു.

ട്രാഫിക് ലംഘനത്തിന്റെ പേരിൽ നടപടിയെടുത്താൽ സമരം ചെയ്യുമെന്നാണ് സ്വകാര്യ ബസ് ജീവനക്കാരുടെ യൂനിയനുകൾ ഭീഷണിപ്പെടുത്തുന്നതെന്ന്​ സർക്കാർ അഭിഭാഷകൻ പറഞ്ഞു​. ആളുകളെ കൊന്നിട്ട് സമരം ചെയ്യുമെന്ന് പേടിപ്പിച്ചാൽ അത്​ അനുവദിക്കരുതെന്ന് കോടതി വാക്കാൽ പറഞ്ഞു. സമരം ചെയ്യുന്നെങ്കിൽ ചെയ്യട്ടെ. ആരെയാണ് അവർ പേടിപ്പിക്കുന്നത്​. കേരളത്തിൽ വാഹനാപകടങ്ങൾ വളരെ കൂടുതലാണ്. ഡ്രൈവർമാർ നിയമം പാലിച്ചിരുന്നെങ്കിൽ അപകടങ്ങൾ കുറക്കാനാകുമായിരുന്നു. വെള്ളിയാഴ്ചത്തെ അപകടത്തിന്​ ഉത്തരവാദിയായ ഡ്രൈവർക്കെതിരെ നടപടി സ്വീകരിച്ച്​ റിപ്പോർട്ട്​ നൽകാൻ നിർദേശിച്ച കോടതി, ഹരജി ഫെബ്രുവരി 23ലേക്ക്​ മാറ്റി.