ശബരിമലയിൽ വിഡിയോ ചിത്രീകരണം നിയന്ത്രിക്കണമെന്ന് ഹൈകോടതി

കൊച്ചി: തീർഥാടകർ​ ഫോൺ കൊണ്ടുവരുന്നത്​ തടയാനാകില്ലെങ്കിലും അതീവസുരക്ഷാ മേഖലയായ ശബരിമല തിരുമുറ്റത്തും സോപാനത്തിന് മുൻ വശവും വിഡിയോ ചിത്രീകരിക്കുന്നത് നിയന്ത്രിക്കണമെന്ന് ഹൈകോടതി. ഇക്കാര്യത്തിൽ നടപടി സ്വീകരിച്ച്​ എക്സിക്യൂട്ടിവ് ഓഫിസർ ബുധനാഴ്ച റിപ്പോർട്ട് സമർപ്പിക്കാൻ ജസ്റ്റിസ് അനിൽ കെ. നരേന്ദ്രൻ, ജസ്റ്റിസ് എസ്. മുരളികൃഷ്ണ എന്നിവരടങ്ങുന്ന ഡിവിഷൻ ബെഞ്ച്​ നിർദേശിച്ചു.

ശബരിമലയിൽ പൊലീസ് ചെയ്യുന്ന സേവനം സ്തുത്യർഹമാണെങ്കിലും പതിനെട്ടാം പടിയിൽ പുറംതിരിഞ്ഞുനിന്ന് ഫോട്ടോ എടുത്ത സംഭവം തെറ്റാണെന്ന്​ കോടതി ചൂണ്ടിക്കാട്ടി. ക്ഷേത്രമര്യാദകൾ എല്ലാവരും പാലിക്കേണ്ടതുണ്ട്. പൊലീസ്​ ഉദ്യോഗസ്ഥർ ഫോട്ടോയെടുത്തത്​ ഉച്ചസമയത്തെ ഇടവേളയിലാണെന്നായിരുന്നു സർക്കാറിന്‍റെ വിശദീകരണം. സംഭവത്തിൽ ചീഫ് പൊലീസ് കോഓഡിനേറ്റർ റിപ്പോർട്ട്​ സമർപ്പിക്കാൻ കോടതി നിർദേശിച്ചു.

ശബരിമല, നിലക്കൽ, പമ്പ, തീർഥാടന പാത എന്നിവിടങ്ങളിൽ കച്ചവടക്കാർ അമിതവില ഈടാക്കുക​യോ മോശം ഭക്ഷണം നൽകുകയോ ചെയ്താൽ കർശന നടപടിയെടുക്കണമെന്ന് കോടതി നിർദേശിച്ചു.