നരഭോജി കടുവയെ വെടിവെക്കാനുള്ള ഉത്തരവിനെതിരെ നൽകിയ ഹരജി ഹൈകോടതി തള്ളി; ഹരജിക്കാരന് 25,000 രൂപ പിഴ

കൊച്ചി: വയനാട്ടിലിറങ്ങിയ നരഭോജി കടുവയെ വെടി​െവച്ചു കൊല്ലാനുള്ള വനം വകുപ്പിന്‍റെ ഉത്തരവ്​ ചോദ്യം ചെയ്യുന്ന ഹരജി ഹൈകോടതി 25,000 രൂപ പിഴ ചുമത്തി തള്ളി. വാകേരിയിലെ ക്ഷീര കർഷകൻ പ്രജീഷിനെ കൊലപ്പെടുത്തിയ കടുവയെ ​കൊല്ലാനുള്ള വനം വകുപ്പ്​ ഉത്തരവ്​ ചോദ്യം ചെയ്ത്​ എറണാകുളം നെട്ടൂരിലെ അനിമൽസ് ആൻഡ് നേച്വർ എത്തിക്‌സ് കമ്യൂണിറ്റിയെന്ന സംഘടന നൽകിയ പൊതുതാൽപര്യ ഹരജിയാണ്​ ചീഫ് ജസ്റ്റിസ് ആശിഷ് ജെ. ദേശായി, ജസ്റ്റിസ് വി.ജി. അരുൺ എന്നിവരടങ്ങുന്ന ഡിവിഷൻ ബെഞ്ച്​ തള്ളിയത്​. വനം വകുപ്പ്​ ഉത്തരവ്​ ശരി​വെച്ച കോടതി രണ്ടാഴ്ചക്കകം സംസ്ഥാന ലീഗൽ സർവിസ് അതോറിറ്റിയിൽ പിഴത്തുക അടക്കാൻ ഹരജിക്കാർക്ക്​ നിർദേശം നൽകി.

നടപടിക്രമങ്ങൾ പാലിക്കാതെയും നാഷനൽ ടൈഗർ കൺസർവേഷൻ അതോറിറ്റി 2019ൽ നൽകിയിട്ടുള്ള മാർഗ നിർദേശങ്ങൾ പാലിക്കാതെയുമാണ്​ ഉത്തരവെന്ന്​ ഹരജിയിൽ ആരോപിച്ചു.

എന്നാൽ, ഒരു മനുഷ്യജീവനാണ് കടുവയുടെ ആക്രമണത്തിൽ നഷ്ടമായതെന്ന്​ ചൂണ്ടിക്കാട്ടിയ കോടതി ഇത്​ നിസ്സാരമായി കാണാനാവില്ലെന്ന്​ വ്യക്തമാക്കി. പ്രശസ്തിക്കുവേണ്ടിയാണോ ഹരജി നൽകിയതെന്ന്​ ഹരജിക്കാരോട്​ ആരാഞ്ഞു. ഹരജി നൽകാനുള്ള കാരണം ഹരജിക്കാരന്​ മാത്രമേ അറിയൂവെന്നും കുറ്റപ്പെടുത്തി. തുടർന്ന്​ നടപടിക്രമങ്ങൾ പാലിച്ചാണ് വനംവകുപ്പ് ഉത്തരവിറക്കിയതെന്ന്​ വിലയിരുത്തിയ ഡിവിഷൻ ബെഞ്ച് 25,000 രൂപ പിഴ ചുമത്തി ഹരജി തള്ളുകയായിരുന്നു.