ശാസ്താംകോട്ട ക്ഷേത്രത്തിൽ ഉടൻ ചെമ്പ് കൊടിമരം സ്ഥാപിക്കണമെന്ന്​ ഹൈകോടതി

കൊച്ചി: കൊല്ലം ശാസ്താംകോട്ട ശ്രീധർമശാസ്താ ക്ഷേത്രത്തിൽ ഉടൻ ചെമ്പ് കൊടിമരം സ്ഥാപിക്കണമെന്ന്​ ഹൈകോടതി. സ്വർണക്കൊടിമരം പുനഃസ്ഥാപിക്കണമെന്ന്​ ആവശ്യപ്പെട്ട് ക്ഷേത്രോപദേശക സമിതി മുൻ സെക്രട്ടറിയും സമസ്ത നായർ സമാജം ജനറൽ സെക്രട്ടറിയുമായ പെരുമറ്റം രാധാകൃഷ്ണനടക്കം നൽകിയ ഹരജികളിലാണ്​ ജസ്റ്റിസ് അനിൽ കെ. നരേന്ദ്രൻ, ജസ്റ്റിസ് പി.ജി. അജിത്കുമാർ എന്നിവരടങ്ങുന്ന ഡിവിഷൻ ബെഞ്ചിന്‍റെ ഉത്തരവ്​.

സ്വർണക്കൊടിമരം സ്ഥാപിക്കാൻ തിരുവിതാംകൂർ ദേവസ്വം ബോർഡിന്​​ സാമ്പത്തിക ശേഷിയില്ലാത്തതും കൊടിമരത്തിൽ പൊതിയാനുള്ള ചെമ്പ് പറ നൽകാൻ തയാറാണെന്ന്​ നിലവിലെ ക്ഷേത്രോപദേശക സമിതി അറിയിച്ചതും പരിഗണിച്ചാണ്​ ചെമ്പ്​ കൊടിമരം സ്ഥാപിക്കാനുള്ള നിർദേശം നൽകിയത്​.

ഹരജിക്കാരൻ ക്ഷേത്രോപദേശക സമിതി സെക്രട്ടറിയായിരിക്കെ ഭക്തജനങ്ങളുടെ സംഭാവനയായ 65 ലക്ഷം ഉപയോഗിച്ച്​ ക്ഷേത്രത്തിൽ സ്വർണക്കൊടിമരം സ്ഥാപിച്ചിരുന്നു. നിറം മങ്ങിയതിനെത്തുടർന്ന്​ ഒരു മാസത്തിനകം ഇത്​ നീക്കി. ഹൈകോടതി ഉത്തരവിനെ തുടർന്ന്​ വിജിലൻസ്​ അന്വേഷണം നടത്തി അന്തിമ റിപ്പോർട്ട്​ കോടതിയിൽ സമർപ്പിച്ചിരിക്കുകയാണ്​.