സ്ത്രീയുടെ ശരീരഘടനയെക്കുറിച്ച് പറയുന്നതും സ്ത്രീത്വത്തെ അപമാനിക്കലെന്ന് ഹൈകോടതി

കൊച്ചി: സ്ത്രീയുടെ ശരീരഘടനയെക്കുറിച്ച് പുകഴ്ത്തിപ്പറയുന്നതും സ്​ത്രീത്വത്തെ അപമാനിക്കലാണെന്ന്​ ഹൈകോടതി. അനാവശ്യമായി ഇത്തരം വർണനകൾ നടത്തുന്നതും അശ്ലീലസന്ദേശങ്ങൾ അയക്കുന്നതും ​ ലൈംഗികച്ചുവയോടെയല്ലെന്ന്​ കരുതാനാവില്ലെന്നും ജസ്റ്റിസ്​ എ. ബദറുദ്ദീൻ വ്യക്തമാക്കി.

സഹപ്രവ‌ർത്തകയുടെ പരാതിയിൽ തനിക്കെതിരെ ആലുവ പൊലീസ് രജിസ്റ്റർ ചെയ്ത കേസ് റദ്ദാക്കണമെന്നാവശ്യപ്പെട്ട് കെ.എസ്.ഇ.ബി മുൻ ഉദ്യോഗസ്ഥൻ പുത്തൻവേലിക്കര സ്വദേശി ആർ. രാമചന്ദ്രൻ നായർ നൽകിയ ഹരജി തള്ളിയാണ് ഉത്തരവ്​.

ശരീരഘടനയെ പുകഴ്​ത്തിയതിനു പുറമേ പ്രതി അശ്ലീലച്ചുവയുള്ള സന്ദേശങ്ങൾ അയക്കുകയും പൊതുമധ്യത്തിൽ അധിക്ഷേപിക്കുകയും ചെയ്തതായി യുവതി പരാതിപ്പെട്ടിരുന്നു. ഫോൺ ബ്ലോക്ക് ചെയ്തിട്ടും മറ്റ് നമ്പറുകളിൽനിന്ന് അശ്ലീല സന്ദേശങ്ങൾ അയക്കുന്നത്​ തുടർന്നു. ഇയാൾക്കെതിരെ യുവതി മേലധികാരികൾക്കും കെ.എസ്.ഇ.ബി വിജിലൻസിനും പരാതി നൽകിയെങ്കിലും നടപടിയുണ്ടാകാത്തതിനെത്തുടർന്ന്​ പൊലീസിനെ സമീപിക്കുകയായിരുന്നു.

ഒരാൾക്ക് നല്ല ശരീരഘടനയാണെന്ന്​ പറയുന്നത്​ ലൈംഗികച്ചുവയോടെയാണെന്ന്​ പറയാനാവില്ലെന്നായിരുന്നു ഹരജിക്കാരന്‍റെ വാദം. എന്നാൽ, ഈ വാദങ്ങളടക്കം കോടതി തള്ളുകയായിരുന്നു.