ശബരിമലയിൽ തീർഥാടകരെ ദേവസ്വം ഗാർഡ് പിടിച്ചുതള്ളിയ സംഭവം: രൂക്ഷ വിമർശനവുമായി ഹൈകോടതി

കൊച്ചി: ശബരിമലയിൽ തീർഥാടകരെ ദേവസ്വം ഗാർഡ് പിടിച്ചുതള്ളിയ സംഭവത്തിൽ ഇടപെട്ട് ഹൈകോടതി. ഇതുസംബന്ധിച്ച മാധ്യമവാർത്തകളെ തുടർന്ന്​ സ്വമേധയ വിഷയം പരിഗണിച്ച ​ജസ്റ്റിസ് അനിൽ കെ. നരേന്ദ്രൻ, ജസ്റ്റിസ് പി.ജി. അജിത്​കുമാർ എന്നിവരടങ്ങുന്ന ഡിവിഷൻ ബെഞ്ച്,​ സംഭവത്തെ രൂക്ഷമായി വിമർശിച്ചു. ഭക്തരെ പിടിച്ചുതള്ളാൻ ഗാർഡിന്​ അനുമതി നൽകിയിരുന്നോയെന്ന്​ ദേവസ്വം ബോർഡിനോട്​ ആരാഞ്ഞു.

മറ്റു പലരും ഭക്തരെ നിയന്ത്രിക്കുന്നുണ്ടായിരുന്നിട്ടും ഒരാൾ മാത്രം എന്തുകൊണ്ടാണിങ്ങനെ പെരുമാറിയത്​. ഭക്തരുടെ ശരീരത്തിൽ സ്പർശിക്കാൻ ഇയാൾക്ക്​ എങ്ങനെയാണ്​ കഴിഞ്ഞത്​. സംഭവം നീതികരിക്കാനാകാത്തതാണ്​. ആരോപണ വിധേയനായ തിരുവിതാംകൂർ ഗ്രൂപ്പിന് കീഴിലുള്ള മണക്കാട് ദേവസ്വത്തിലെ വാച്ചർ അരുൺകുമാറിനെ ഹരജിയിൽ സ്വമേധയ കക്ഷിചേർത്ത കോടതി, ഇയാൾക്കെതിരെ സ്വീകരിച്ച നടപടികൾ അറിയിക്കാൻ അസിസ്റ്റന്റ് ദേവസ്വം കമീഷണർക്ക്​ നിർദേശവും നൽകി.

മകരവിളക്ക് ദിവസം സന്നിധാനത്ത് സുരക്ഷ ഡ്യൂട്ടിയിലുണ്ടായിരുന്ന ദേവസ്വം ഗാർഡ് തീർഥാടകരെ തള്ളിനീക്കിയ സംഭവം ഏറെ വിമർശനങ്ങൾക്കിടയാക്കിയിരുന്നു. ഇയാളുടെ ശരീരഭാഷയും മുഖഭാവവുമൊന്നും ശബരിമലയിൽ ജോലി ചെയ്യാൻ അനുയോജ്യമായതല്ലെന്ന് കോടതി വിമർശിച്ചു. അക്രമഭാവത്തോടെയാണ് അയാൾ തീർഥാടകരെ തള്ളിനീക്കിയത്​. ഏറെനേരം ക്യൂ നിന്നാണ് തീർഥാടകർ തൊഴാൻ എത്തുന്നത്. ഗാർഡിന്‍റെ പെരുമാറ്റം കോടതിയുടെ മുൻ നിർദേശങ്ങൾ പാലിക്കാതെയാണ്​. ഇത്തരം പെരുമാറ്റം പൊലീസും ദേവസ്വം ​ഓഫിസറും ഇടപെട്ട്​ തടയണമായിരുന്നു. തിരക്ക് നിയന്ത്രിക്കാൻ ഒട്ടേറെ നിർദേശങ്ങൾ നൽകിയതുമാണ്​. ശ്രീകോവിലിന് മുന്നിൽ നിന്ന്​ തീർഥാടകരെ ഒരു ദയയുമില്ലാതെ തള്ളിനീക്കുന്ന മാധ്യമദൃശ്യങ്ങളടക്കം കോടതി പരിശോധിച്ചു.

ദേവസ്വം ചീഫ് വിജിലൻസ്​ ഓഫിസറുടെ റിപ്പോർട്ടിന്റെ അടിസ്ഥാനത്തിൽ ശബരിമല സ്പെഷൽ കമീഷണർ റിപ്പോർട്ട്​ സമർപ്പിച്ചു. തിരക്ക് അമിതമായതോടെ തീർഥാടകരെ വേഗത്തിൽ കടത്തിവിടാൻ നിർദേശം നൽകിയിരുന്നുവെന്നാണ് ദേവസ്വം സെക്യൂരിറ്റി ഓഫിസറുടെ റിപ്പോർട്ടിൽ പറയുന്നത്. അരുൺകുമാറിനെ ജോലിയിൽനിന്ന് ഒഴിവാക്കി തിരിച്ചയതായും വ്യക്തമാക്കിയിട്ടുണ്ട്​. തിരക്ക് നിയന്ത്രിക്കാൻ ബാരിക്കേഡ് വേണമെന്നും മുതിർന്ന പൗരന്മാർക്കും ഭിന്നശേഷിക്കാർക്കും കുട്ടികൾക്കും ആരോഗ്യ പ്രശ്നങ്ങളുള്ളവർക്കും പ്രത്യേക പരിഗണന നൽകണണമെന്നും മുമ്പേ നിർദേശിച്ചിട്ടുള്ളതാണെന്ന്​ ഓർമിപ്പിച്ച കോടതി, ഹരജി വീണ്ടും 24ന് പരിഗണിക്കാൻ മാറ്റി.