അഭയ കേസ്​: വിചാരണ തടയണമെന്ന പ്രതികളുടെ ഇടക്കാല ആവശ്യം ഹൈകോടതി അനുവദിച്ചില്ല

കൊച്ചി: സിസ്​റ്റർ അഭയ കേസിലെ വിചാരണ നടപടികൾ തടയണമെന്ന രണ്ട്​ പ്രതികളുടെ ഇടക്കാല ആവശ്യം ഹൈകോടതി അനുവദിച്ചില്ല. ഒന്നാം പ്രതി ഫാ. തോമസ്​ എം. കോട്ടൂർ, മൂന്നാം പ്രതി സിസ്​റ്റർ സെഫി എന്നിവരുടെ ആവശ്യമാണ്​ സിംഗിൾ ബെഞ്ച്​ നിരസിച്ചത്​. വിചാരണ ഒഴിവാക്കണമെന്നും കുറ്റമുക്​തരാക്കണമെന്നും ആവശ്യപ്പെട്ട്​ ഇവർ നൽകിയ ഹരജിയിൽ തീർപ്പാക്കുംവരെ നടപടി സ്​റ്റേ ചെയ്യണമെന്ന്​ ഇടക്കാല ആവശ്യമുന്നയിക്കുകയായിരുന്നു.

ഇരുവരുടെയും ഹരജി രണ്ടാഴ്ചക്കുശേഷം പരിഗണിക്കാൻ മാറ്റുകയും ചെയ്​തു. കേസ് കെട്ടിച്ചമച്ചതാണെന്നാരോപിച്ച് ഇവർ സമര്‍പ്പിച്ച വിടുതല്‍ അപേക്ഷ മാർച്ച്​ ആദ്യം വിചാരണക്കോടതി തള്ളിയിരുന്നു. ഇതിനെതിരെയാണ് ഹൈകോടതിയെ സമീപിച്ചത്. എഫ്‌.​െഎ.ആര്‍, കേസ് ഡയറി, സാക്ഷി മൊഴികൾ അടക്കമുള്ള രേഖകള്‍ തുടങ്ങിയവ പരിശോധിക്കാതെ ആവശ്യം പരിഗണിക്കാനാവില്ലെന്ന് കോടതി വ്യക്​തമാക്കി. രേഖകള്‍ ഹാജരാക്കാമെന്ന് വാദത്തിനിടെ സി.ബി.ഐ അറിയിച്ചു. ഇതിന്​ സി.ബി.​െഎക്ക്​ രണ്ടാഴ്​ച അനുവദിച്ചു. 

അതേസമയം, കേസില്‍നിന്ന് ഒഴിവാക്കണമെന്നാവശ്യപ്പെട്ട് നാലാം പ്രതിയും ക്രൈംബ്രാഞ്ച് ഉദ്യോഗസ്ഥനുമായിരുന്ന കെ.ടി. മൈക്കിള്‍ സമര്‍പ്പിച്ച ഹരജിയിലെ വാദം തുടരും.