ഹോസ്​റ്റലിൽനിന്ന്​ ആയുധങ്ങൾ കണ്ടെടുത്ത സംഭവം: രണ്ട് വിദ്യാർഥികളെ ചോദ്യം ചെയ്തു

കൊച്ചി: എറണാകുളം മഹാരാജാസ്​ കോളജ് ഹോസ്​റ്റലിൽനിന്ന്​ ആയുധങ്ങൾ കണ്ടെടുത്ത സംഭവത്തിൽ രണ്ട് വിദ്യാർഥികളെ പൊലീസ്​ ചോദ്യം ചെയ്തു. ആയുധങ്ങൾ കണ്ടെത്തിയ മുറിയിൽ താമസിച്ചിരുന്ന ആറ്​ വിദ്യാർഥികളോടും ചോദ്യം ചെയ്യലിന്​ ഹാജരാകണമെന്ന് ആവശ്യപ്പെട്ട് കഴിഞ്ഞ ദിവസം പൊലീസ്​ നോട്ടീസ്​ നൽകിയിരുന്നു.

ഇതേതുടർന്നാണ്​ രണ്ടുപേർ ശനിയാഴ്ച ഹാജരായത്. ജില്ലക്ക് പുറത്ത്​ താമസമാക്കിയ രണ്ട് വിദ്യാർഥികളെയാണ്​ ചോദ്യം ചെയ്തതെന്നും ഇവർക്ക് സംഭവവുമായി നേരിട്ട് ബന്ധമുണ്ടെന്ന് കണ്ടെത്തിയിട്ടില്ലെന്നും സെൻട്രൽ എസ്​.ഐ  ജോസഫ് സാജൻ പറഞ്ഞു. മറ്റ്​ വിദ്യാർഥികളെ വരും ദിവസങ്ങളിൽ ചോദ്യം ചെയ്യും.

സംഭവത്തിൽ അന്വേഷണം പുരോഗമിക്കുന്നതായും എല്ലാവരെയും ചോദ്യം ചെയ്താലേ കൂടുതൽ വിവരങ്ങൾ ലഭ്യമാകൂവെന്നും പൊലീസ്​ പറഞ്ഞു. ആയുധങ്ങൾ കണ്ടെത്തിയ നിലയിലെ മുറികളിൽ താമസിക്കുന്ന അധ്യാപകരിൽനിന്ന്​ കഴിഞ്ഞ ദിവസം പൊലീസ്​ മൊഴിയെടുത്തിരുന്നു. മഹാരാജാസ്​ ഗ്രൗണ്ടിനടുത്തുള്ള എം.സി.ആർ.വി ഹോസ്​റ്റലിൽ നവീകരണ പ്രവർത്തനങ്ങൾ നടക്കുന്നതിനാൽ 19 വിദ്യാർഥികൾക്ക് താൽക്കാലികമായി അധ്യാപകരുടെ ഹോസ്​റ്റലിൽ പ്രവേശനം നൽകിയിരുന്നു. ഇവർക്ക് അനുവദിച്ച ഒന്നാം നിലയിലെ 14-ാം നമ്പർ മുറിയിൽനിന്നാണ്​ ആയുധങ്ങൾ കണ്ടെടുത്തത്.