ഗാന്ധിവധത്തിന്​ ശേഷവും ആർ.എസ്​.എസ്​ ആഭിമുഖ്യം മാറിയില്ല -ഇ. ശ്രീധരന്‍

കോഴിക്കോട്​: ഗാന്ധിവധത്തിന്​ ശേഷവും ആർ.എസ്​.എസ്​ ആശയത്തോടുള്ള തന്‍റെ ആഭിമുഖ്യം കുറഞ്ഞിരുന്നില്ലെന്ന്​ മെട്രോമാൻ ഇ. ശ്രീധരൻ. ഗാന്ധിവധ കാലത്ത്​ താൻ ആർ.എസ്​.എസിലുണ്ട്​. ആ സമയത്ത്​ വിക്​ടോറിയയിൽ പഠിക്കുകയാണ്​. ഗാന്ധിവധത്തിനുശേഷം ആർ.എസ്​.എസിനെ ന​ിരോധിച്ചിരുന്നു. പക്ഷേ, ആ ന​ിരോധനം മൂലം ആർ.എസ്​.എസിൽ നിന്ന്​ വിട്ടുപോയില്ല. പഠനം കഴിഞ്ഞയുടൻ ഉദ്യോഗത്തിൽ ചേർന്നതിനാൽ പ്രവർത്തിച്ചിരുന്നില്ല എന്നേയുള്ളു. പക്ഷേ, അപ്പോഴും ആർ.എസ്​.എസ് ആശയങ്ങൾ മനസ്സിൽ സൂക്ഷിച്ചിരുന്നെന്നും പാലക്കാട്​ മണ്ഡലത്തിലെ ബി.ജെ.പി സ്​ഥാനാർഥിയായ ഇ. ശ്രീധരൻ വ്യക്​തമാക്കി. 'മീഡിയവൺ' ചാനലിന്​ നൽകിയ അഭിമുഖത്തിൽ സംസാരിക്കുകയായിരുന്നു അദ്ദേഹം. ​

കുട്ടിക്കാലത്ത്​ ആർ.എസ്​.എസ്​ ആശയങ്ങളിൽ ആകൃഷടനായതാണ്​ താൻ. സ്​നേഹിതരാണ്​ ശാഖയിലേക്ക്​ കൊണ്ടുപോയത്​. അതിൽ ദുഃഖമില്ല. അഭിമാനത്തോടെ ഒരു കാര്യം പറയാൻ കഴിയും. അവിടെ നിന്ന്​ പഠിച്ച അച്ചടക്കം, രാജ്യസ്​നേഹം, ശാരീരികക്ഷമത തുടങ്ങിയ സ്വഭാവഗുണങ്ങൾ ആണ്​ ഇപ്പോഴും നിലനിൽക്കുന്നത്​. ബി.ജെ.പിക്ക്​ കേരളത്തിൽ പുതിയ മുഖം കൊണ്ടുവരുന്നതിനാണ്​ താൻ അവർക്കൊപ്പം ചേർന്നത്​. താൻ ചേർന്നത്​ കൊണ്ട്​ ബി.ജെ.പിയുടെ മുഖച്​ഛായ മാറിയിട്ടുണ്ടെന്നാണ്​ വി​ശ്വാസമെന്നും അദ്ദേഹം പറഞ്ഞു.

കേരളത്തിൽ ബി.ജെ.പിയെ കൈ പിടിച്ചുയർത്താനും സംസ്​ഥാന വികസനം നേരെയാക്കാനുമാണ്​ താൻ രാഷ്​ട്രീയത്തിൽ ചേർന്നത്​. എൽ.ഡി.എഫുമായും യു.ഡി.എഫ​ുമായും അടുത്തിടപഴകിയിട്ടുണ്ട്​. ആ അനുഭവം കൊണ്ട്​ അവരുമായി ചേർന്നുപോകാൻ കഴിയുകയില്ലെന്ന്​ ഉറപ്പായി. സർവിസിൽ ഇരുന്ന കാലത്ത്​ കോൺഗ്രസിനാണ്​ വോട്ട്​ ചെയ്​തിരുന്നത്​. ഡൽഹിയിൽ ക്ഷീല ദീക്ഷിത്തിന്​ വോട്ട്​ ചെയ്​തത്​ കോൺഗ്രസ്​ ആണോയെന്ന്​ നോക്കിയല്ല. അവരുടെ വ്യക്​തിത്വത്തിനാണ്​. അത​ുപേ​ാലെ പാലക്കാട്​ മണ്ഡലത്തിലെ വോട്ടർമാർ തന്‍റെ വ്യക്​തിത്വത്തിന്​ വോട്ട്​ ചെയ്യുമെന്നാണ്​ വിശ്വാസമെന്നും ശ്രീധരൻ പറഞ്ഞു.

എം.എൽ.എ സ്​ഥാനാർഥി എന്ന നിലക്കല്ല, മുഖ്യമന്ത്രി എന്ന നിലക്കാണ്​ ജനങ്ങൾ തന്നെ സമീപിക്കുന്നത്​. തെരഞ്ഞെടുപ്പ്​ കഴിഞ്ഞാൽ കേരളം ആര്​ ഭരിക്കുമെന്ന്​ തീരുമാനിക്കുന്ന നിർണായക ശക്​തിയായി ബി.ജെ.പി മാറുമെന്ന്​ ഉറപ്പുണ്ട്​. തന്നെ മുഖ്യമന്ത്രി സ്​ഥാനാർഥിയായി ഉയർത്തിക്കാട്ടിയതുമായി ബന്ധ​പ്പെട്ട വിവാദങ്ങളിൽ വിഷമമില്ല. മുഖ്യമന്ത്രിയാകാൻ രാഷ്​ട്രീയത്തിലെത്തിയ ആളല്ല താൻ. 67 വർഷത്തെ ഔദ്യോഗിക ജീവിതത്തിലെ അനുഭവങ്ങളും പരിചയ സമ്പത്തും കേരളത്തിന്‍റെ വികസനത്തിനായി ഉപയോഗിക്കുകയാണ്​ ലക്ഷ്യം. ആ സേവനത്തിനുള്ള തുടക്കമായാണ്​ എം.എൽ.എയാകുന്നത്​. മുഖ്യമന്ത്രിയാകുന്നതൊക്കെ അതിനുശേഷമുള്ള കാര്യമാണ്​. ബി.ജെ.പിയിൽ ഭിന്നതയുണ്ടെന്നത്​ മാധ്യമസൃഷ്​ടിയാണ്​. ഇത്ര ജനാധിപത്യബോധവും അച്ചടക്കവുമുള്ള പാർട്ടി വേറെയില്ല. കേന്ദ്ര നേതാക്കളുമായി ചർച്ച ചെയ്​തിട്ടല്ല താൻ ബി.ജെ.പിയിൽ ചേർന്നത്​. അവരിൽ നിന്ന്​ ഒരു ഓഫറും ലഭിച്ചില്ല. കേരളത്തിൽ ഭരണമാറ്റം വേണമെന്ന വാശിയുടെ ഭാഗമായാണ്​ ബി.ജെ.പിയിൽ​ ചേർന്നത്​.

മുതിർന്നവരുടെ കാൽ തൊട്ടുതൊഴുക എന്നത്​ നമ്മുടെ സംസ്​കാരത്തിന്‍റെ ഭാഗമാണ്​. ഗാന്ധിജിയുടെ കാലിൽ നിരവധി പേർ തൊട്ടുവണങ്ങിയി​ട്ടില്ലേ? കമ്യൂണിസ്റ്റുകാർ ആണ്​ ഇതിനെയൊക്കെ കുറ്റം പറയുന്നത്​. സംസ്​കാരങ്ങളെ പതുക്കെ എടുത്ത്​ കളഞ്ഞ്​ കമ്യൂണിസം കൊണ്ടുവരികയാണ്​ അവരുടെ ലക്ഷ്യം. സംസ്​കാരം ഉള്ളിടത്ത്​ കമ്യൂണിസം വാഴില്ല. കമ്യൂണിസ്റ്റുകാരുമായി തനിക്ക്​ ഒരിക്കലും യോജിച്ചുപോകാൻ കഴിയില്ലെന്നും ഇ. ശ്രീധരൻ പറഞ്ഞു.