'കമ്യൂണിസത്തിന്‍റെ ചൂടറിഞ്ഞാണ് വളർന്നത്': വ്യാജ വാർത്തകൾക്കെതിരെ പ്രതികരണവുമായി ഇന്നസെന്‍റ്

കൊച്ചി: സിനിമയിൽ വന്നതിന്‍റെ ആവേശത്തിലാണ് കമ്യൂണിസ്റ്റായതെന്ന സൈബർ പ്രചരണങ്ങൾക്കെതിരെ പ്രതികരണവുമായി മുൻ എം.പി ഇന്നസെന്‍റ്. തന്‍റെ പിതാവ് അടിയുറച്ച കമ്യൂണിസ്റ്റ് പ്രവർത്തകനായിരുന്നുവെന്നും ആ രാഷ്ട്രയത്തിന്‍റെ ചൂടറിഞ്ഞാണ് താൻ വളർന്നതെന്നും മരണം വരെ അതിൽ മാറ്റമുണ്ടാകില്ലെന്നും ഇന്നസെന്‍റ് ഫേസ്ബുക്കിൽ കുറിച്ചു.

വ്യാജ പ്രചരണത്തിന്‍റെ പോസ്റ്റർ പങ്കുവെച്ചുകൊണ്ടായിരുന്നു അദ്ദേഹത്തിന്‍റെ പ്രതികരണം. എന്തെങ്കിലും പറയാനുണ്ടെങ്കിൽ നേരിട്ട് പറഞ്ഞോളാമെന്നും, ആ ഉത്തരവാദിത്തം ആരും ഏറ്റെടുക്കേണ്ടതില്ലെന്നും അദ്ദേഹം വ്യക്തമാക്കി. തന്‍റെ പേരിൽ വ്യാജ വാർത്തകൾ പ്രചരിക്കുന്ന സാഹചര്യത്തിലാണ് പ്രതികരണമെന്നും അദ്ദേഹം അറിയിച്ചു.

ഫേസ്ബുക്ക് പോസ്റ്റിന്‍റെ പൂർണ്ണരൂപം:

എന്റെ പിതാവ് അടിയുറച്ച ഒരു കമ്യൂണിസ്റ്റായിരുന്നു.

ആ രാഷ്ട്രീയത്തിന്റെ ചൂടറിഞ്ഞാണ് ഞാൻ വളർന്നതും ജീവിച്ചതും.

മരണം വരെ അതിൽ മാറ്റമില്ല.

എന്തെങ്കിലും പറയാനുണ്ടെങ്കിൽ ഞാൻ തന്നെ പറഞ്ഞോളാം.

മറ്റാരും ആ ഉത്തരവാദിത്വം ഏറ്റെടുക്കേണ്ടതില്ല.

എന്റെ പേരിൽ ഇറക്കിയ മറ്റൊരു വ്യാജ പ്രസ്താവന കൂടി ഇന്ന് കാണുകയുണ്ടായി. അതുകൊണ്ട് മാത്രം പറഞ്ഞതാണ്.