ഇടുക്കി ഡി.എം.ഒ ഡോ. എൽ. മനോജിന് സസ്പെൻഷൻ

തൊടുപുഴ: ഗുരുതര ആരോപണങ്ങൾ ഉന്നയിച്ച്​ ലഭിച്ച പരാതികളുടെ അടിസ്ഥാനത്തിൽ ഇടുക്കി ജില്ല മെഡിക്കൽ ഓഫിസർ (ഡി.എം.ഒ) ഡോ. എൽ. മനോജിനെ അന്വേഷണ വിധേയമായി സസ്​പെൻഡ്​ ചെയ്തു. ആരോഗ്യ വകുപ്പിൽനിന്നടക്കം നിരവധി പരാതി ലഭിച്ചതിനെ തുടർന്നാണ്​ സസ്​പെൻഷൻ​.

15 ദിവസത്തിനുള്ളിൽ അന്വേഷിച്ച്​ റിപ്പോർട്ട്​ സമർപ്പിക്കാൻ ആ​രോഗ്യ വകുപ്പ്​ ഡയറക്ടർക്ക്​ സർക്കാർ ജോയന്‍റ്​ സെക്രട്ടറി നിർദേശവും നൽകി​. ഇടുക്കി ഡെപ്യൂട്ടി ജില്ല മെഡിക്കൽ ഓഫിസർ ഡോ. എസ്​. സുരേഷ്​ വർഗീസിനാണ്​ ജില്ല മെഡിക്കൽ ഓഫിസറുടെ അധിക ചുമതല നൽകിയിരിക്കുന്നത്​.

ജില്ലയിലെ ആരോഗ്യരംഗത്ത്​ നിയമനത്തിനും സ്ഥലംമാറ്റത്തിനും ലൈസൻസിനും വിരമിച്ച ചില ഉദ്യോഗസ്ഥരുടെ കാർമികത്വത്തിൽ ഏജൻസികൾ പ്രവർത്തിക്കുന്നത്​ നേരത്തേ വാർത്തയായിരുന്നു. ജില്ലയിലെ ആരോഗ്യ പ്രവർത്തകരിൽനിന്നടക്കം ആരോഗ്യ വകുപ്പിന്​ പരാതി പോയിരുന്നു. ഇതേ തുടർന്നുള്ള അന്വേഷണമാണ്​ ജില്ല മെഡിക്കൽ ഓഫിസറുടെ സസ്​പെൻഷനിൽ എത്തിയതെന്ന്​ ആരോഗ്യ പ്രവർത്തക തന്നെ ചൂണ്ടിക്കാണിക്കുന്നു.