കമ്യൂണിസ്​റ്റുകാരൻ മോശമായാൽ കെട്ട മുട്ട പോലെ മോശമാകും -കോടിയേരി

തിരുവനന്തപുരം: കമ്യൂണിസ്​റ്റ്​ പാർട്ടിക്ക്​ അകത്തും അവസരവാദികളുണ്ടാവു​​മെന്നും കമ്യൂണിസ്​റ്റുകാരൻ മോശമായാൽ കെട്ട മുട്ട പോലെ വളരെ മോശമായിരിക്കുമെന്നും സി.പി.എം മുൻ സംസ്​ഥാന ​സെക്രട്ടറി കോടിയേരി ബാലകൃഷ്​ണൻ. നിയമസഭ തെരഞ്ഞെടുപ്പിൽ ഏതാനും സി.പി.എം, സി.പി.​െഎ നേതാക്കൾ​ പാർട്ടിവിട്ട്​ എൻ.ഡി.എ സ്ഥാനാർഥികളായി മാറിയത്​ സംബന്ധിച്ച ചോദ്യത്തോട്​ പ്രതികരിക്കുകയായിരുന്നു അദ്ദേഹം. ഇൗ വഞ്ചകന്മാർ അവസരവാദ നിലപാട്​ സ്വീകരിക്കുന്നതോടെ കമ്യൂണിസ്​റ്റുകൾ അല്ലാതായിക്കഴിഞ്ഞെന്നും 'മാധ്യമ'ത്തിന്​ നൽകിയ അഭിമുഖത്തിൽ കോടിയേരി വ്യക്​തമാക്കി.

കോന്നിയിൽ കെ. സുരേന്ദ്ര​െൻറ വിജയത്തിനായി ബി.ജെ.പിയ​ുമായി സി.പി.എം ഡീൽ ഉറപ്പിച്ചുവെന്ന 'ഒാർഗനൈസർ' മുൻ പത്രാധിപർ ബാലശങ്കറിന്‍റെ ആരോപണം അടിസ്​ഥാന രഹിതമാണെന്നും കോടിയേരി പറഞ്ഞു. ''സി.പി.എമ്മും ബി.ജെ.പിയും തമ്മിൽ ഡീലെന്ന്​ പറയാൻ കേരളത്തിൽ ആർക്കാണ്​ സാധിക്കുക? ഇന്ത്യയിൽ മറ്റു സംസ്ഥാനങ്ങളിൽ ബി.ജെ.പിയെ തോൽപിക്കാൻ കോൺഗ്രസുമായി സഹകരിക്കുന്ന പാർട്ടിയാണ്​ സി.പി.എം. അത്​ രഹസ്യമായി എടുത്തതല്ല. പാർട്ടി കോൺഗ്രസ്​ ചർച്ച ചെയ്​തെടുത്ത തീരുമാനമാണ്​. സി.പി.എമ്മിന്​ ഒരിക്കലും ആർ.എസ്​.എസുമായി രാഷ്​ട്രീയമായും പ്രത്യയശാസ്​ത്രപരമായും യോജിക്കാൻ സാധിക്കുകയില്ല. മത രാഷ്​ട്രമാണ്​ അവർ ഉന്നയിക്കുന്ന മുദ്രാവാക്യം. അത്തരം മതമൗലിക വാദികളുമായി ഞങ്ങൾക്ക്​ യോജിക്കാനേ സാധിക്കില്ല.

അടിയന്തരാവസ്ഥ കഴിഞ്ഞ 1977ലെ തെരഞ്ഞെടുപ്പിൽ ജയപ്രകാശ്​ നാരായണൻ മുൻകൈയെടുത്ത്​ സോഷ്യലിസ്​റ്റ്​ പാർട്ടിയെയും സ്വതന്ത്ര പാർട്ടിയെയും ജനസംഘത്തെയും എല്ലാം ലയിപ്പിച്ച്​ ജനതാപാർട്ടിയാക്കി. അവരുമായി ഞങ്ങൾ സഹകരിച്ചത്​ അടിയന്തരാവസ്ഥ ​പോകാനാണ്. അടിയന്തരാവസ്ഥ മാറിയപ്പോൾ സി.പി.എം നിലപാട്​ മാറ്റി. ആർ.എസ്​.എസ്​ ഉൾക്കൊള്ളുന്ന പാർട്ടിയുമായി ബന്ധം വി​േച്ഛദിക്കണമെന്ന നിലപാട്​ സ്വീകരിച്ചു. 1979ൽ തലശ്ശേരിയടക്കം നാല്​ മണ്ഡലങ്ങളിൽ തെരഞ്ഞെടുപ്പ്​ നടന്നപ്പോൾ ആർ.എസ്​.എസി​െൻറ വോട്ട്​ ഞങ്ങൾക്ക്​ വേണ്ട എന്നാണ് ഇ.എം.എസ് പ്രസംഗിച്ചത്​. അതേ നിലപാടാണ്​ സി.പി.എമ്മിന്​ ഇപ്പോഴുമുള്ളത്​. ആർ.എസ്​.എസുമായി ​ചേർന്ന്​ ഞങ്ങൾക്ക്​ ഒരു സീറ്റും കേരളത്തിൽ ജയിക്കേണ്ട കാര്യമില്ല.

1991ലെ നിയമസഭ തെരഞ്ഞെടുപ്പിൽ യു.ഡി.എഫ്​ കോലീബി സഖ്യം ഉണ്ടാക്കിയത്​ ഇടതുപക്ഷത്തി​െൻറ തുടർഭരണം അട്ടിമറിക്കാനാണ്​. അന്ന് രാജീവ്​ ഗാന്ധി കൊല​െചയ്യപ്പെട്ടിട്ടുപോലും ഇൗ സഖ്യം വിജയിച്ചില്ല.'' കോടിയേരി വ്യക്​തമാക്കി.