ഞാൻ ബ്ലാക്മെയിൽ ചെയ്തെങ്കിൽ മുകേഷ് ശബ്ദസന്ദേശം പുറത്തുവിടട്ടെ -പരാതിക്കാരി

കൊച്ചി: മുകേഷിനെ പണംചോദിച്ച് താൻ ബ്ലാക്മെയിൽ ചെയ്തെങ്കിൽ ശബ്ദസന്ദേശം പുറത്തുവിടട്ടെയെന്ന് പരാതിക്കാരിയായ നടി. ആരോപണം ഇരകളെ മാനസികമായി തളർത്താനാണ്. മോശം അനുഭവം ഉണ്ടായതിന്റെ തെളിവെല്ലാം പൊലീസിന്​ നൽകി. തെളിവുകൾ സൂക്ഷിച്ചുവെച്ചിട്ടുണ്ടായിരുന്നെന്നും പരാതിക്കാരി പറഞ്ഞു.

സിനിമ മേഖലയിൽ ദുരന്തം അനുഭവിച്ച സ്ത്രീകളുണ്ട്. അവർക്ക് നീതി കിട്ടുമെന്ന സന്ദേശമാണ് സർക്കാറിൽനിന്നുണ്ടായത്. പൊലീസ് നടപടി വേഗത്തിലായത് ആശ്വാസമായി. നീതി കിട്ടുമെന്ന ബോധ്യം ഇരകൾക്കുണ്ടായി. സത്യസന്ധരായ ജനപ്രതിനിധികളെയാണ് ജനങ്ങൾക്ക് വേണ്ടത്; പൊയ്മുഖങ്ങളെയല്ല. ഉപ്പു തിന്നവൻ വെള്ളം കുടിക്കണം. മനസ്സ്​​ വിങ്ങിയാണ്​ ജീവിച്ചതെന്നും പരാതിക്കാരി പറഞ്ഞു.

മുകേഷിൽനിന്ന് മോശം അനുഭവം ഉണ്ടായതിനുശേഷം താൻ മിണ്ടിയിട്ടില്ല. സിനിമയിൽ മോശമായ കാര്യങ്ങൾ നടക്കുന്നതായി ജനം അറിയണം. ഭീഷണി കാര്യമാക്കുന്നില്ല. ഏത് പ്രമുഖനായാലും പ്രശ്നമല്ല. നിയമപോരാട്ടത്തിന്​ തയാറാണ്. സത്യം കൂടെയുണ്ടെങ്കിൽ പേടിക്കേണ്ട കാര്യമില്ല. ഏഴുപേർക്കെതിരെയും രഹസ്യമൊഴി കൊടുക്കുമെന്നും നടി പറഞ്ഞു.

മുകേഷിന്‍റെ കാര്യത്തിൽ സി.പി.എം ഉചിത നടപടി സ്വീകരിക്കുമെന്ന് പ്രതീക്ഷ -മന്ത്രി ബിന്ദു

തിരുവനന്തപുരം: മുകേഷ്​ എം.എൽ.എക്കെതിരെ ജാമ്യമില്ലാ വകുപ്പുപ്രകാരം പൊലീസ് കേസെടുത്തതിൽ ഇടതുപക്ഷ പ്രസ്ഥാനവും സി.പി.എമ്മും ഉചിത നടപടി സ്വീകരിക്കുമെന്നാണ് പ്രതീക്ഷയെന്ന് മന്ത്രി ആർ. ബിന്ദു.

ഹേമ കമ്മിറ്റി റിപ്പോർട്ടിന്‍റെ അടിസ്ഥാനത്തിൽ നിരവധി വനിതകൾ ആരോപണവുമായി എത്തുന്ന സാഹചര്യത്തിൽ നിജസ്ഥിതി പരിശോധിക്കേണ്ടതുണ്ട്. ആര്​ കുറ്റം ചെയ്താലും ശിക്ഷിക്കപ്പെടണം. നിരപരാധികൾ ശിക്ഷിക്കപ്പെടാനും പാടില്ലെന്ന്​ വാർത്തസമ്മേളനത്തിൽ മന്ത്രി പറഞ്ഞു.