ഐ.എം. വിജയൻ ഇനി മലപ്പുറം എം.എസ്.പി അസിസ്റ്റന്‍റ് കമാൻഡന്‍റ്

മലപ്പുറം: കാൽപന്ത്​ രംഗത്തെ അതികായൻ ഐ.എം. വിജയൻ ഇനി മലബാർ സ്പെഷൽ പൊലീസ് അസിസ്​റ്റൻറ് കമാൻഡൻറ്. ബുധനാഴ്ച രാവിലെ മലപ്പുറം എം.എസ്.പി ആസ്ഥാനത്ത് കമാൻഡൻറ് യു. അബ്​ദുൽ കരീമി​െൻറ കാര്യാലയത്തിലെത്തി അദ്ദേഹം ചുമതലയേറ്റെടുത്തു.

കേരള പൊലീസ് ഫുട്ബാൾ ടീമി​െൻറ ടെക്നിക്കൽ ഡയറക്ടർ കൂടിയായ വിജയൻ ഇനി മലപ്പുറം കേന്ദ്രമാക്കി പ്രവർത്തിക്കും. എം.എസ്.പി നിലമ്പൂർ ക്യാമ്പാണ് ഇപ്പോൾ പൊലീസ് ടീമി​െൻറ ആസ്ഥാനം.

സി.ഐ റാങ്കിൽ തൃപ്പൂണിത്തുറയിലെ കേരള ആംഡ് പൊലീസ് ഒന്നാം ബറ്റാലിയനിൽ സേവനമനുഷ്ഠിക്കവെയാണ് സ്ഥാനക്കയറ്റം ലഭിച്ചത്. എം.എസ്.പിയിൽ പുതുതായി ആരംഭിക്കുന്ന പൊലീസ് ഫുട്ബാൾ അക്കാദമിയുടെ ഡ‍യറക്ടറായി വിജയനെ ഇതിനകം നിയമിച്ചിട്ടുണ്ട്. അസി. കമാൻഡൻറുമാരും സഹതാരങ്ങളുമായ ഹബീബ് റഹ്​മാ​െൻറയും റോയ് റോജസി​െൻറയും സാന്നിധ്യത്തിലാണ് ചുമതലയേറ്റത്.

പുതിയ സ്ഥാനലബ്​ധിയിൽ സന്തോഷമുണ്ടെന്നും ഫുട്ബാളിന് വളക്കൂറുള്ള നാട്ടിൽ ആരംഭിക്കുന്ന അക്കാദമിയെ ഏറെ പ്രതീക്ഷയോടെയാണ് കാണുന്നതെന്നും വിജയൻ പറഞ്ഞു.