പാമ്പു കടിയേറ്റവർക്ക് ഉടൻ ചികിത്സ: ആന്റിവെനം നല്‍കുന്ന ആശുപത്രികളുടെ പേരുകള്‍ പ്രസിദ്ധീകരിക്കാൻ മന്ത്രിയുടെ നിർദേശം

പാമ്പു കടിയേറ്റവരുടെ ചികിത്സക്കായുള്ള ആന്റി വെനം നല്‍കുന്ന ആശുപത്രികളുടെ പേരുകള്‍ പ്രസിദ്ധീകരിക്കാന്‍ ആരോഗ്യ മന്ത്രി വീണ ജോര്‍ജ് ആരോഗ്യ വകുപ്പ് ഡയറക്ടര്‍ക്ക് നിര്‍ദേശം നല്‍കി. മന്ത്രിയുടെ നേതൃത്വത്തില്‍ ചേര്‍ന്ന ഉന്നതതല യോഗത്തിലാണ് നിര്‍ദേശം. മുഖ്യമന്ത്രി ആവശ്യപ്പെട്ടതിനെ തുടര്‍ന്നാണ് നടപടി. സംസ്ഥാന തലത്തിലും ജില്ലാ തലത്തിലും ആശുപത്രികളുടെ പേരുകള്‍ പ്രസിദ്ധീകരിക്കണം.

താലൂക്ക് ആശുപത്രികള്‍ മുതല്‍ മെഡിക്കല്‍ കോളജുകള്‍ വരെയുള്ള ആശുപത്രികളിലാണ് ആന്റിവെനം ലഭ്യമാക്കിയിട്ടുള്ളത്. പാമ്പു കടിയേറ്റാല്‍ വളരെ പെട്ടെന്ന് ആന്റിവെനം ചികിത്സ ലഭിക്കേണ്ടതിനാല്‍ അധിക ദൂരം യാത്ര ചെയ്യാതെ പരമാവധി ആശുപത്രികളില്‍ ആന്റിവെനം ചികിത്സ ലഭ്യമാക്കാനുള്ള ശ്രമത്തിന്റെ ഭാഗമായാണ് ആരോഗ്യ വകുപ്പ് നടപടി.