കല്ലെറിഞ്ഞ് പരിക്കേൽപിക്കൽ​ മാരകായുധം കൊണ്ടുള്ള ആക്രമണത്തിന്​ സമാനം -​ഹൈകോടതി

കൊച്ചി: കല്ലെറിഞ്ഞ് പരിക്കേൽപിക്കുന്നത്​ മാരകായുധം കൊണ്ടുള്ള ആക്രമണത്തിന്​ സമാനമെന്ന്​ ഹൈകോടതി. മാരകായുധങ്ങൾ ഉപയോഗിച്ചുള്ള ആക്രമണങ്ങൾ മരണകാരണമാകാവുന്ന കുറ്റകൃത്യത്തിന്‍റെ പരിധിയിൽ വരുന്നതാണ്​. കല്ലെറിഞ്ഞ്​ പരിക്കേൽക്കുന്നതും മരണത്തിന്​ കാരണമായേക്കാം. കല്ലിന്റെ വലിപ്പം, രൂപം, തീവ്രത, ഉപയോഗിച്ച രീതി എന്നിവ പരിശോധിച്ച്​ ആയുധംകൊണ്ടുള്ള ആക്രമണത്തിന്​ സമാനമായ വകുപ്പ്​ ചുമത്താവുന്നതാണെന്ന്​ ജസ്റ്റിസ്​ എ. ബദറുദ്ദീൻ വ്യക്തമാക്കി.

അതിർത്തിത്തർക്കവുമായി ബന്ധപ്പെട്ട് അയൽവാസിയായ സ്ത്രീയുടെ തലക്ക്​ കല്ലെറിഞ്ഞ് പരിക്കേൽപിച്ച കൊടകര സ്വദേശിയുടെ ഹരജിയാണ്​ കോടതി പരിഗണിച്ചത്​. ഗുരുതര വകുപ്പുകൾ ചുമത്തി ഇരിങ്ങാലക്കുട ഫസ്റ്റ് ക്ലാസ് മജിസ്ട്രേറ്റ്​ കോടതിയിൽ നിലവിലുള്ള കേസ് റദ്ദാക്കണമെന്നാവശ്യപ്പെട്ടാണ് ഹരജിക്കാരൻ കോടതിയെ സമീപിച്ചത്.

ഇന്ത്യൻ ശിക്ഷ നിയമം, ഭാരതീയ ന്യായസംഹിത എന്നിവ പ്രകാരം മാരകായുധമോ മറ്റ്​ മാർഗങ്ങളോ ഉപയോഗിച്ച്​ മരണ കാരണമാകാവുന്ന പരിക്കേൽപിക്കലിന്‍റെ പരിധിയിൽ വരുന്നതിനാൽ കേസ്​ നിലനിൽക്കുന്നതാണെന്ന്​ കോടതി ചൂണ്ടിക്കാട്ടി. കേസ് റദ്ദാക്കാൻ പ്രഥമദൃഷ്ട്യാ കാരണമില്ലെന്ന് ചൂണ്ടിക്കാട്ടിയ സിംഗിൾബെഞ്ച് ഹരജി തള്ളുകയായിരുന്നു. അതേസമയം, തെളിവുകളുടെ അടിസ്ഥാനത്തിൽ ഇക്കാര്യം വിചാരണ കോടതിക്ക് നിശ്ചയിക്കാമെന്നും കോടതി വ്യക്തമാക്കി.