മെഡിക്കൽ കോളജുകളിലെ സുരക്ഷ ഓഡിറ്റ് പൂർത്തിയാക്കാൻ നിർദേശം

തിരുവനന്തപുരം: സംസ്ഥാനത്തെ സർക്കാർ-സ്വകാര്യ മെഡിക്കൽ കോളജുകളിലെ സുരക്ഷ ഓഡിറ്റ് പൂർത്തിയാക്കാൻ സൂപ്രണ്ടുമാർക്ക് മെഡിക്കൽ വിദ്യാഭ്യാസ ഡയറക്ടറുടെ (ഡി.എം.ഇ) നിർദേശം. ഒരാഴ്ചക്കുള്ളിൽ ഇതുസംബന്ധിച്ച റിപ്പോർട്ട് നൽകണം. രോഗികൾക്കൊപ്പമുള്ള കൂട്ടിരിപ്പുകാർക്കുള്ള നിയന്ത്രണം കർശനമായി നടപ്പാക്കണം.

വാർഡുകളിൽ രോഗിക്കൊപ്പം ഒരാളെ മാത്രമേ അനുവദിക്കൂ. അത്യാഹിത വിഭാഗത്തിലുള്ള രോഗികള്‍ക്കൊപ്പം രണ്ടുപേർക്കേ അനുമതി നല്‍കാവൂ. പാസ് സംവിധാവും സെക്യൂരിറ്റി സംവിധാനവും കർശനമായി പാലിക്കണം. ആശുപത്രികളിൽ സി.സി ടി.വി കാമറകൾ, പൊലീസ് ഔട്ട് പോസ്റ്റ്, അലാറം സിസ്റ്റം എന്നിവ സ്ഥാപിച്ച് സുരക്ഷ ഉറപ്പാക്കണമെന്നും നിർദേശമുണ്ട്.