ഇന്റർനെറ്റ് പി.ഒ

തിരുവനന്തപുരം: ബി.എസ്​.എൻ.എൽ ഇന്‍റർനെറ്റ്​ കണക്ഷൻ ‘വീട്ടിലെത്തിക്കാൻ’ ഇനി പോസ്റ്റ്​മാൻമാരും. ഫൈബർ ശൃംഖല വ്യാപകമാക്കുന്നതിന്‍റെ ഭാഗമായാണ്​ ബി.എസ്​.എൻ.എൽ കേരള സർക്കിളും തപാൽ വകുപ്പും കൈകോർക്കുന്നത്​. ഫൈബർ ​ബ്രോഡ്​ബാൻഡ്​​ പ്ലാനിലേക്ക്​ ഗുണഭോക്താക്കളെ ചേർക്കുന്ന ചുമതലയാണ്​ പോസ്റ്റ്​മാൻമാർക്ക് നൽകുന്നത്​. ഇതിനായി പ്രത്യേകം മൊബൈൽ ആപ്പും സജ്ജമാക്കിയിട്ടുണ്ട്. തപാൽ ആവശ്യങ്ങൾക്ക്​ വീട്ടിലെത്തുന്ന ഘട്ടങ്ങളിൽ ഇൻറർനെറ്റ്​ രജിസ്​ട്രേഷനും പോസ്റ്റ്​മാൻമാർ വഴി ചെയ്യുമെന്നതാണ്​ പ്രത്യേകത. രജിസ്ട്രേഷൻ നടപടികൾക്കായി 50 രൂപ തപാൽ വകുപ്പ്​ ഈടാക്കും. ഈ തുക ഗുണഭോക്താവിന്​ ആദ്യ ബില്ലിൽ തന്നെ ഇളവ്​ ചെയ്യുംവിധമാണ്​ ക്രമീകരണം.

പോസ്റ്റ് ഓഫിസ് വഴി ഓപ്​റ്റിക്കൽ ഫൈബർ കണക്ഷൻ

ഇതിനുപുറമെ, ഫൈബർ കണക്ഷന്​ താൽപര്യമുള്ള ഗുണഭോക്താക്കൾക്ക്​ സംസ്ഥാനത്തെ ഏത്​ പോസ്റ്റ്​ ഓഫിസ്​ വഴിയും രജിസ്​റ്റർ ചെയ്യാനുള്ള സൗകര്യവും ഏർപ്പെടുത്തിയിട്ടുണ്ട്​. ഇതിനകം പോസ്റ്റ്​മാൻമാരും കൗണ്ടർ സ്റ്റാഫുമടക്കം 12000 പേർ ആപ്പിൽ രജിസ്​റ്റർ ചെയ്തുകഴിഞ്ഞു. ഇവർ​ വഴി രജിസ്​ട്രേഷൻ നടത്തിയാൽ, കേബിൾ ശൃംഖലയുള്ള പ്രദേശമാണെങ്കിൽ പരമാവധി മൂന്ന്​ ദിവസത്തിനുള്ളിൽ കണക്ഷൻ ലഭ്യമാക്കാനാണ്​ ബി.എസ്​.എൽ.എൽ തീരുമാനം. നിലവിൽ 6.75 ലക്ഷം ഓപ്​റ്റിക്കൽ ഫൈബർ വഴിയുള്ള ഇന്‍റർനെറ്റ്​ കണക്ഷനുകളാണ്​ ബി.എസ്​.എൻ.എല്ലിന്​ കേരളത്തിലുള്ളത്​. പഴയ രീതിയിൽ ​ലാൻഡ്​

ലൈൻ വഴിയുള്ള കണക്ഷനുകൾ കൂടിയാകു​മ്പോൾ ബ്രോഡ്​ബാൻഡ്​ കണക്ഷനുകളുടെ എണ്ണം എട്ടു ലക്ഷം കവിയും. ലാൻഡ്​ലൈൻ വഴിയുള്ള കണക്ഷനുകൾ ഓപ്​റ്റിക്കൽ ഫൈബറിലേക്ക്​ മാറ്റാനുള്ള ദൗത്യവും സജീവമാണ്​. പ്രതിമാസം 15000 കണക്ഷനുകളാണ്​ സംസ്ഥാനത്ത്​ ബി.എസ്.എൻ.എല്ലിന്​ ലഭിക്കുന്നത്.

മറ്റു സേവനങ്ങളും

ഫൈബർ കൺഷൻ മാത്രമല്ല, ബി.എസ്​.എൻ.എല്ലിന്‍റെ മറ്റ്​ സേവനങ്ങളും തപാൽ വകുപ്പ്​ വഴി ജനങ്ങളിലെത്തിക്കാൻ ആലോചനയുണ്ട്​. പുതിയ സിം, സിം ആക്ടിവേഷൻ, 2ജി സിം 4ജി​യിലേക്കും 5ജിയിലേക്കും മാറ്റൽ, റീചാർജ്​ എന്നിവയാണ്​ ഇത്തരത്തിൽ പരിഗണനയിലുള്ളത്​. വി.ആർ.എസിനെ തുടർന്ന്​ ജീവനക്കാരും സ്വന്തം ഓഫിസുകളും കുറഞ്ഞ സാഹചര്യത്തിലാണ്​ തപാൽ വകുപ്പിന്‍റെ സഹകരണത്തോടെ സേവനസൗകര്യങ്ങൾ വ്യാപിപ്പിക്കുന്നത്​.