കോടികളുടെ നിക്ഷേപത്തട്ടിപ്പ്: മാനേജർ അറസ്റ്റിൽ

പത്തനംതിട്ട: കോടിക്കണക്കിന് രൂപയുടെ നിക്ഷേപത്തട്ടിപ്പ് കേസിലെ അഞ്ചാം പ്രതി കോയിപ്രം പൊലീസിന്‍റെ പിടിയിലായി. കുറിയന്നൂർ പി.ആർ.ഡി മിനി നിധി ലിമിറ്റഡി‍െൻറ മാനേജർ കോയിപ്രം തൊട്ടപ്പുഴശ്ശേരി ചിറയിറമ്പ് മാരാമൺ കാവുംതുണ്ടിയിൽ വീട്ടിൽ ഡേവിസാണ് (64) പിടിയിലായത്.

ഇയാൾ മുൻ‌കൂർ ജാമ്യത്തിന് ഹൈകോടതിയെ സമീപിച്ചിരുന്നു. ഒന്നു മുതൽ മൂന്നുവരെ പ്രതികളായ അനിൽകുമാർ (59), ഇയാളുടെ ഭാര്യ ദീപ (52), മകൻ അനന്ദു വിഷ്ണു (28) എന്നിവരെ നേരത്തേ എറണാകുളം എളമക്കരയിലെ ഫ്ലാറ്റിൽ നിന്ന് പിടികൂടിയിരുന്നു.പ്രതികളുടെ സ്വത്തു വിവരങ്ങളെപ്പറ്റിയും നിക്ഷേപതുകകളുടെയും മറ്റും വിനിയോഗം സംബന്ധിച്ചും ഇൻസ്‌പെക്ടർ സജീഷ് കുമാറി‍െൻറ നേതൃത്വത്തിൽ വിശദമായ അന്വേഷണം തുടരുകയാണ്.