രണ്ട്​ ലക്ഷം ​കൈക്കൂലി വാങ്ങവേ ഇന്ത്യൻ ഓയിൽ കോർപറേഷൻ ഡി.ജി.എം പിടിയിൽ

തിരുവനന്തപുരം: ഇന്ത്യൻ ഓയിൽ കോർപറേഷൻ എറണാകുളം ഓഫിസിലെ ഡെപ്യൂട്ടി ജനറൽ മാനേജർ അലക്സ് മാത്യുവിനെ രണ്ട് ലക്ഷം രൂപ കൈക്കൂലി വാങ്ങവേ സംസ്​ഥാന വിജിലൻസ് പിടികൂടി. ഗ്യാസ് ഏജൻസി ഉടമയായ കുറവൻ​കോണം സ്വദേശിയിൽ നിന്നാണ് ഇയാൾ കൈക്കൂലി ആവശ്യപ്പെട്ടത്. ശനിയാഴ്ച രാത്രി 7.30ഓടെ കുറവൻകോണത്തെ വീട്ടിൽവെച്ച്​ കൈക്കൂലി വാങ്ങു​മ്പോഴായിരുന്നു സ്പെഷൽ ഇൻവെസ്റ്റിഗേഷൻ യൂനിറ്റ്​ ഡെപ്യൂട്ടി പൊലീസ് സൂപ്രണ്ടിന്റെ നേതൃത്വത്തിലുള്ള വിജിലൻസ് സംഘം അറസ്റ്റ്​ ചെയ്തത്​. അലക്സ് മാത്യുവിനെ തിരുവനന്തപുരം വിജിലൻസ് കോടതിയിൽ ഹാജരാക്കും.

‘ഓപറേഷൻ സ്പോട്ട് ട്രാപ്പി’ന്റെ ഭാഗമായായിരുന്നു പരിശോധന. കൊല്ലം കടയ്ക്കൽ സ്വദേശിയും കുറവൻ​കോണം പണ്ഡിറ്റ് കോളനിയിൽ താമസക്കാരനുമാണ്​ പരാതിക്കാരൻ. ഇയാളുടെ ഭാര്യയുടെ പേരിൽ കൊല്ലം കടയ്ക്കലിൽ ഐ.ഒ.സിയുടെ ഗ്യാസ് ഏജൻസി പ്രവർത്തിക്കുന്നുണ്ട്​. ഈ ഭാഗത്ത്​ മറ്റ് മൂന്ന് ഏജൻസികൾ കൂടി ഐ.ഒ.സിക്കുണ്ട്. രണ്ട് മാസം മുമ്പ്​ അലക്സ് മാത്യു പരാതിക്കാരനെ ഫോണിൽ വിളിച്ച്​ കൊച്ചിയിലെ തന്‍റെ വീട്ടിൽ വന്ന്​ കാണാൻ ആവശ്യ​പ്പെട്ടു. ഇതുപ്രകാരം കൊച്ചിയിലെത്തിയ പരാതിക്കാര​നോട്​ ഭാര്യയുടെ പേരിലെ ഗ്യാസ് ഏജൻസിയിൽനിന്ന്​ ഉപഭോക്​താക്കളെ അടുത്തുള്ള മറ്റ്​ ഏജൻസികളിലേക്ക്​ മാറ്റാതിരിക്കാൻ പത്ത് ലക്ഷം രൂപ ആവശ്യപ്പെട്ടു.

പരാതിക്കാരൻ തുക നൽകാൻ സാധിക്കില്ലെന്ന് പറഞ്ഞ്​ മടങ്ങി. ഇതിന്​ പിന്നാലെ പരാതിക്കാരന്റെ ഭാര്യയുടെ പേരിലെ ഗ്യാസ് ഏജൻസിയിൽനിന്ന്​ 1200ഓളം കണക്ഷൻ അലക്സ് മാത്യു മാറ്റി അടുത്തുള്ള ഏജൻസിക്ക് നൽകി. തുടർന്ന് മാർച്ച്​ 15ന്​ രാവിലെ അലക്സ് മാത്യു പരാതിക്കാരന്റെ ഫോണിൽ വിളിച്ച്​ താൻ തിരുവനന്തപുരത്ത് ഉണ്ടാകുമെന്നും പറഞ്ഞ തുക അവിടെവെച്ച്​ നൽകി​യില്ലെങ്കിൽ കൂടുതൽ ഉപഭോക്​താക്കളെ മറ്റ്​ ഏജൻസികളിലേക്ക്​ മാറ്റുമെന്നും ഭീഷണിപ്പെടുത്തി. പരാതിക്കാരൻ വിവരം പൂജപ്പുരയിലെ വിജിലൻസ്​ സ്പെഷൽ ഇൻവെസ്റ്റിഗേഷൻ യൂനിറ്റ് -1 പൊലീസ് സൂപ്രണ്ടിനെ അറിയിക്കുകയായിരുന്നു.