ഇരിങ്ങാലക്കുട പറപ്പൂക്കര ഇരട്ടക്കൊല: അഞ്ച് പ്രതികളുടെയും തടവ് ശരിവെച്ചു

കൊച്ചി: ഇരിങ്ങാലക്കുട പറപ്പൂക്കര ഇരട്ടക്കൊലപാതക കേസിലെ​ പ്രതികളുടെ ശിക്ഷ ഹൈകോടതി ശരിവെച്ചു.

2015 ഡിസംബർ 25ന് ആമ്പല്ലൂർ വരാക്കര സ്വദേശി മെൽവിൽ, മുരിയാട് സ്വദേശി ജിത്തു (വിശ്വജിത്ത് -33) എന്നിവർ കൊല്ലപ്പെട്ട കേസിലെ ഒന്നുമുതൽ അഞ്ചുവ​രെ പ്രതികളുടെ ശിക്ഷയാണ്​ ജസ്റ്റിസ് രാജ വിജയരാഘവൻ, ജസ്റ്റിസ് ജോബിൻ സെബാസ്റ്റ്യൻ എന്നിവരടങ്ങുന്ന ഡിവിഷൻ ബെഞ്ച് ശരിവെച്ചത്.

ആനന്ദപുരം സ്വദേശി രജീഷ് (മക്കു), പറപ്പൂക്കര സ്വദേശി ചെറുവാൾ ശരത്ത് (ശരവണൻ), നെടുമ്പാൾ സ്വദേശി സന്തോഷ് (കൊങ്കൻ), ആനന്ദപുരം സ്വദേശികളായ ഷിനു, രഞ്ജു എന്നിവർക്കാണ്​ കൊലപാതകത്തിന് ഇരട്ട ജീവപര്യന്തവും വധശ്രമത്തിന് 20 വർഷം കഠിന തടവും പിഴയും ഇരിങ്ങാലക്കുട അഡീ. സെഷൻസ് കോടതി വിധിച്ചത്​. അഞ്ചുപേരുടെയും ശിക്ഷ ഹൈകോടതി ശരിവെക്കുകയായിരുന്നു.

പ്രതികൾ ബന്ധുവായ സ്ത്രീയോട്​ അപമര്യാദയായി പെരുമാറിയത്​ ചോദ്യംചെയ്തതിലുള്ള വൈരാഗ്യമാണ്​ കൊലപാതകത്തിന്​ കാരണമായത്​. മെൽവിനെയും ജിത്തുവിനെയും പ്രശ്നം തീർക്കാനെന്ന വ്യാജേന പ്രതികൾ വിളിച്ചുകൊണ്ടുപോയി വെട്ടിക്കൊലപ്പെടുത്തിയെന്നാണ്​ കേസ്.

സെഷൻസ്​ കോടതി ഉത്തരവ്​ ചോദ്യംചെയ്ത്​ പ്രതികൾ നൽകിയ ഹരജിയാണ്​ കോടതി പരിഗണിച്ചത്​. എന്നാൽ, മുൻകൂട്ടി ആസൂത്രണംചെയ്ത്​ കൃത്യമായി നടപ്പാക്കിയ കുറ്റകൃത്യമാണിതെന്ന്​ തെളിവുകളിൽനിന്ന്​ വ്യക്തമാണെന്ന്​ വിലയിരുത്തിയ കോടതി തുടർന്ന്​ അപ്പീൽ തള്ളുകയായിരുന്നു.