ഏത് പ്രശ്നത്തിലും സി.പി.എം ക്യാപ്സ്യൂളാണ്​ ജമാഅത്തെ ഇസ്​ലാമി; എല്ലാ അസുഖങ്ങൾക്കും അത് മതിയാകില്ല -പി. മുജീബുറഹ്​മാൻ

മലപ്പുറം: പാർട്ടി​യെ സംബന്ധിച്ച് എന്തു പ്രശ്നം വന്നാലും സി.പി.എം ഉപയോഗിക്കുന്ന ക്യാപ്സ്യൂളാണ്​ ജമാഅത്തെ ഇസ്​ലാമിയെന്നും എന്നാൽ എല്ലാ അസുഖങ്ങൾക്കും ആ ക്യാപ്സ്യൂൾ മതിയാകില്ലെന്നും ജമാഅത്തെ ഇസ്​ലാമി കേരള അമീർ പി. മുജീഹ്​മാൻ. യഥാർഥ പ്രശ്നങ്ങളിൽനിന്നും ശ്രദ്ധ തിരിക്കാനാണ്​ സർക്കാറും സി.പി.എമ്മും ശ്രമിക്കുന്നതെന്നും അദ്ദേഹം വാർത്തസമ്മേളനത്തിൽ ആരോപിച്ചു.

പൊലീസുമായും സ്വർണക്കള്ളക്കടത്തുമായും ബന്ധപ്പെട്ട്​ ഉയർന്നുവന്ന വളരെ ഗൗരവമായ വിമർശനങ്ങളെ ശരിയായി പരിശോധിക്കുന്നതിന്​ പകരം വളരെ അപകടകരമായ ആഖ്യാനം​ രൂപപ്പെടുത്താനാണ്​ സി.പി.എം ശ്രമിക്കുന്നത്​. സംഘ്​ പരിവാറിന്​ ആയുധംകൊടുക്കാനാണ്​ മുഖമന്ത്രി ദ ഹിന്ദുവിന്​ അഭിമുഖം നൽകിയത്​. മുഖ്യമന്ത്രി പറഞ്ഞ കാര്യങ്ങൾ സംഘ്​ പരിവാറും കേന്ദ്ര സർക്കാറും നാളെ കേരളത്തി​ന്​ ​നേരെ ഉപയോഗിക്കും. അഭിമുഖത്തിൽ പി.ആർ. ഏജൻസിയുടെ ഇടപെടൽ സംബന്ധിച്ച്​ മുഖ്യമന്ത്രിക്ക്​ മറുപടിയില്ല. പി.ആർ. ഏജൻസിക്ക്​ പിന്നിൽ ആരാ​െണന്ന്​ മുഖ്യമന്ത്രി വ്യക്​തമാക്കണ​മെന്നും മുജീബ്​റഹമാൻ ആവശ്യപ്പെട്ടു.

സംഘ്​ പരിവാർ കാലങ്ങളായി ഉയർത്തിയ ആശയങ്ങളാണ്​ സി.പി.എം ബോധപൂർവ്വം മലപ്പുറത്തെക്കുറിച്ച്​ പ്രചരിപ്പിക്കുന്നത്​. സി.പി.എം നേതാക്കൾ നേരത്തെയും മുസ്​ലിം സമുദായത്തെ അപരവത്​കരിക്കുന്ന രീതിയിൽ സംസാരിച്ചിട്ടുണ്ട്​. ഗെയിൽ സമരക്കാരെ തീ​വ്രവാദികളാക്കിയതും ​മാഷാ അല്ലാ സ്റ്റിക്കറും കാഫിർ സ്ക്രീൻഷോട്ടുമെല്ലാം ഇസ്​ലാമോഫോബിയ സൃഷ്ടിച്ച്​ മുസ്​ലിംസമുദായത്തെ അപരവത്​കരിക്കാനുള്ള ശ്രമങ്ങളുടെ ഭാഗമാണെന്നും അമീർ ആരോപിച്ചു.

രാഷ്ട്രീയ പ്രതിസന്ധിയിൽനിന്നും രക്ഷപ്പെടാൻ സാമുദായിക ധ്രുവീകരണത്തിനാണ്​ സി.പി.എം ശ്രമിക്കുന്നത്​. എട്ടു വർഷം കൂടെ നിന്ന പി.വി. അൻവർ പുറത്തുപോയപ്പോൾ തീവ്രവാദിയായി. രാഷ്ട്രീയ എതിരാളികൾക്കുനേരെ വർഗീയ ചാപ്പ അടിക്കുന്നത്​ രാഷ്ട്രീയ സദാചാരമില്ലായ്മയാണ്​. സ്വർണ്ണകടത്തു കേസിൽ എന്തുകൊണ്ട്​ കാര്യക്ഷമമായ അന്വേഷണം ഉണ്ടാകുന്നില്ല? പൂരംകലക്കാൻ നേതൃത്വംകൊടുത്ത എ.ഡി.ജി.പി എം.ആർ. അജിത്​കുമാറിനെതിരെ മാറ്റാൻ മുഖ്യമന്ത്രി എന്തു​െകാണ്ട് തയ്യാറാകുന്നില്ല? ആർ.എസ്​.എസ്​ നേതാക്കളുമായി എ.ഡി.ജി.പി ചർച്ച നടത്തിയത്​ എന്തിനാണെന്ന്​ വെളിപ്പെടുത്തണമെന്നും മുജീബ്​റഹ്​മാൻ ആവശ്യ​പ്പെട്ടു. വാർത്തസമ്മേളനത്തിൽ

ജമാഅത്തെ ഇസ്​ലാമി സംസ്ഥാന സെക്രട്ടറി ശിഹാബ്​ പൂക്കോട്ടൂർ, ജില്ല പി.ആർ. സെക്രട്ടറി കുഞ്ഞിമുഹമ്മദ്​ മുരിങ്ങേക്കൽ എന്നിവരും പ​ങ്കെടുത്തു.