20 ലക്ഷം പേർക്ക്​ തൊഴിൽ: ആസ്​ട്രേലിയൻ കമ്പനിയുമായി ധാരണ

തിരുവനന്തപുരം: 20 ലക്ഷം വിദ്യാസമ്പന്നർക്ക്​ അഞ്ചുവർഷം കൊണ്ട്​ തൊഴിൽ നൽകുന്ന പദ്ധതിക്കായി​ കെ-ഡിസ്ക്​ (കേരള ഡെവലപ്​മെന്‍റ്​ ആൻഡ്​ ഇന്നൊവേഷൻ സ്​ട്രാറ്റജിക്​ കൗൺസിൽ) ആസ്​ട്രേലിയ ആസ്ഥാനമായ ഫ്രീലാൻസർ​ ഡോട്ട്​ കോമുമായി ധാരണയിലെത്തി. അന്താരാഷ്​ട്ര തലത്തിലെ തൊഴിലവസരങ്ങൾ കേരളത്തിലെ തൊഴിലന്വേഷകർക്ക്​ ലഭ്യമാക്കുകയാണ്​ ലക്ഷ്യം. തൊഴിലവസരങ്ങൾ ഫ്രീലാൻസർ കെ -ഡിസ്കിന്​ നൽകും.

കൈമാറുന്ന ഡേറ്റ വെളിപ്പെടുത്താൻ പാടില്ലെന്ന കരാർ കെ- ഡിസ്കും ആസ്​ട്രേലിയൻ കമ്പനിയുമായി ഉണ്ടാക്കും. ഇതിന്​ സർക്കാർ അനുമതി നൽകി. തൊഴിൽ ദാതാവിന്​​ വിവരങ്ങൾ നൽകുന്നതുമായി ബന്ധപ്പെട്ട പൂർണ ഉത്തരവാദിത്തം ഉദ്യോഗാർഥിക്ക് തന്നെയായിരിക്കും. തൊഴിലന്വേഷകരുടെ വിവരങ്ങൾ കെ-ഡിസ്ക്​ നേരിട്ട്​ ആർക്കും നൽകില്ല. ഫ്രീലാൻസർ ഡോട്ട്​കോം വഴി വരുന്ന അവസരങ്ങളിൽ ഉദ്യോഗാർഥികൾ നേരിട്ട്​ തന്നെ വിവരങ്ങൾ കൈമാറണമെന്ന വ്യവസ്ഥയാണുള്ളത്. ഡേറ്റ കൈമാറ്റവുമായി ബന്ധപ്പെട്ട വിഷയങ്ങളിൽ കെ-ഡിസ്കിന്​ ഉത്തരവാദിത്തമുണ്ടാകില്ല.

ലോകത്തെ വമ്പൻ മാർക്കറ്റ്​ ​​േപ്ലസ്​ വെബ്​സൈറ്റാണ്​ ഫ്രീലാൻസറെന്ന്​​ ആസൂത്രണ-സാമ്പത്തികകാര്യ വകുപ്പിന്‍റെ ഉത്തരവിൽ പറയുന്നു. താൽപര്യപത്രം ക്ഷണിച്ചാണ്​ കെ-ഡിസ്ക്​ അവരെ തെരഞ്ഞെടുത്തത്​. ലോകത്തെ തന്നെ മികച്ച കമ്പനികളിൽ വൻതോതിൽ അപ്രന്‍റിസ്​ഷിപ്​ അവസരങ്ങൾ ഫ്രീലാൻസർ​ വഴി ലഭ്യമാണ്​. ലഭ്യമായ അവസരങ്ങൾ കെ-ഡിസ്​കിന്​ ഡിജിറ്റൽ വർക്ക്​ഫോഴ്​സ്​ മാനേജ്​മെന്‍റ്​ സിസ്റ്റമായി (ഡി.ഡബ്ല്യു.എം.എസ്​) ഫ്രീലാൻസർ കൈമാറും. ഇത്​ ഉദ്യോഗാർഥികൾക്ക്​ ഉപയോഗപ്പെടുത്താം. പദ്ധതിയുടെ ഭാഗമായാണ്​​ വിവരങ്ങൾ രഹസ്യമാക്കുമെന്നും വെളിപ്പെടുത്തില്ലെന്നുമുള്ള നോൺ ഡിസ്​​ക്ലോഷർ കരാർ ഉണ്ടാക്കുന്നത്​. ഇതിന്​ സംസ്ഥാന നിയമവകുപ്പ്​, ഐ.ടി വകുപ്പ്​, ചീഫ്​ സെക്രട്ടറി എന്നിവർ ഉപാധികളോടെ അംഗീകാരം നൽകി.

നിലവിലെ മാനദണ്ഡങ്ങളും നിയമവും ഐ.ടി ചട്ടവും അനുസരിച്ച്​ ഡേറ്റ സുരക്ഷ കർശനമായി പാലിക്കണം, പൊതുതാൽപര്യം അനുസരിച്ച്​ മാത്രമാകണം ഡേറ്റ ​കൈമാറ്റം, മൂന്നാം കക്ഷിക്ക്​ വിവരം കൈമാറരുത്​, ഇതുമായി ബന്ധപ്പെട്ട കോടതി നിർദേശങ്ങൾ പാലിക്കണം, ഉദ്ദേശിച്ച കാര്യത്തിന്​ മാത്രമേ ഡേറ്റ ഉപയോഗിക്കാവൂ, കാലാവധിക്ക്​ ശേഷം ഡേറ്റ എന്ത്​ ചെയ്യുമെന്നതിൽ വ്യക്തത വേണം എന്നീ വ്യവസ്ഥകളോടെയാണ്​ അനുമതി. ​