യു.ഡി.എഫ്​ വിടുമ്പോൾ ജോസ്​.കെ. മാണി രാജ്യസഭാംഗത്വം രാജിവെക്കണം​ -ചെന്നിത്തല

തിരുവനന്തപുരം: ഉപതെരഞ്ഞെടുപ്പിനെ നേരിടാൻ യു.ഡി.എഫ്​ സജ്ജമാണെന്ന്​ പ്രതിപക്ഷ നേതാവ്​ രമേശ്​ ചെന്നിത്തല. ചവറയിൽ ഷിബു ബേബി ജോണും കുട്ടനാട്ടിൽ അഡ്വ. ജേക്കബ്​ എബ്രഹാമും സ്ഥാനാർഥികളാവുമെന്ന്​ ചെന്നിത്തല പറഞ്ഞു. ഇരുവരും തന്നെയായിരുന്നു കഴിഞ്ഞ തവണയും യു.ഡി.എഫ്​ സ്ഥാനാർഥികളായത്​. യു.ഡി.എഫ്​ ഒറ്റക്കെട്ടായാണ്​ സ്ഥാനാർഥികളെ തീരുമാനിച്ചത്​. കേരള കോൺഗ്രസ്​ ജോസ്​ വിഭാഗത്തെ യോഗത്തിലേക്ക്​ ക്ഷണിച്ചിരുന്നില്ല. നിയമസഭക്ക്​ അകത്തും പുറത്തും യു.ഡി.എഫിനെതിരെ നിലപാടെടുക്കുന്ന ഒരു കക്ഷിയെ എങ്ങനെ മുന്നണിയുടെ ഭാഗമായി കാണാനാവുമെന്നും​ ചെന്നിത്തല ചോദിച്ചു. യു.ഡി.എഫ്​ യോഗതീരുമാനങ്ങൾ മാധ്യമങ്ങൾക്ക്​ മുമ്പിൽ വിശദീകരിക്കുകയായിരുനു അദ്ദേഹം.

യു.ഡി.എഫ്​ വിട്ട്​ ജോസ്​ കെ മാണി വിഭാഗം എന്ത്​ നിലപാട്​ സ്വീകരിച്ചാലും കേരള കോൺഗ്രസിനെ സ്​​നേഹിക്കുന്നവർ യു.ഡി.എഫിനൊപ്പം തുടരുമെന്ന്​ ചെന്നിത്തല പറഞ്ഞു. അങ്ങനെ തുടരുന്നവർക്ക്​ എല്ലാ സംരക്ഷണവും നൽകും. യു.ഡി.എഫിനോട്​ വി​ശ്വാസ വഞ്ചന കാണിച്ചതിനുള്ള ശിക്ഷ ജനം കേരള കോൺഗ്രസ്​ ജോസ്​ വിഭാഗത്തിന്​​ നൽകും. കോൺഗ്രസ്​ നൽകിയ രാജ്യസഭാംഗത്തിലിരുന്നുകൊണ്ടാണ്​ ജോസ്​ .കെ. മാണി യു.ഡി.എഫിനെ വിമർശിക്കുന്നത്​. മുന്നണി വിടു​ന്ന സന്ദർഭത്തിൽ രാജ്യസഭാംഗത്വവും യു. ഡി.എഫിൻെറ പേരിൽ നിന്ന്​ ജയിച്ച പാർലമെൻറ്​ അംഗത്വവും നിയമസഭാംഗത്വവും രാജി വെക്കാനുള്ള ധാർമികത കാണിക്കണമെന്നും ചെന്നിത്തല പറഞ്ഞു.

സർക്കാറിന്​ നിയമവാഴ്​ച ഉറപ്പാക്കാൻ സാധിക്കാത്ത അതീവ ഗുരുതരമായ സാഹചര്യമാണ്​ ഇപ്പോൾ സംസ്ഥാനത്തുള്ളതെന്ന് പ്രതിപക്ഷ നേതാവ്​​ കുറ്റപ്പെടുത്തി. അഴിമതിയിലും തീവെട്ടി കൊള്ളയിലും മുങ്ങിത്താഴ്​ന്നുകൊണ്ടിരിക്കുന്ന സർക്കാർ ഈ കോവിഡ്​ കാലത്ത്​ ജനങ്ങളുടെ സമാധാന ജീവിതം പോലും അസാധ്യമാക്കിക്കൊണ്ടാണ്​ മുന്നോട്ട്​ പോകുന്നത്​. കേരളത്തിൽ സമാധാനത്തോടെ ജീവിക്കാനും പ്രവർത്തിക്കാനും കഴിയാത്ത സാഹചര്യമാണുള്ളതെന്നും അദ്ദേഹം ആരോപിച്ചു.

കോവിഡ്​ ബാധിച്ച ആളുകൾക്ക്​ ​പോലും സുരക്ഷിതത്വമില്ലാത്ത സ്ഥിതിയിലേക്ക്​ കാര്യങ്ങൾ എത്തി നിൽക്കുകയാണ്​. ഭരണത്തിലുള്ള സർക്കാറിൻെറ നിയന്ത്രണം പൂർണമായും നഷ്​ടപ്പെട്ടിരിക്കുന്നു. മുഖ്യമ​ന്ത്രിയുടെ ഓഫിസ്​ കേന്ദ്രീകരിച്ചു നടന്ന സ്വർണ കള്ളക്കടത്ത്​, പാർട്ടി സെക്രട്ടറിയു​ടെ വീടുമായി ബന്ധപ്പെട്ട്​ നടക്കുന്ന മയക്കു മരുന്ന്​ കടത്ത്​, ഭരണ കക്ഷിക്കാർക്ക്​ വേണ്ടി കേസുകൾ അട്ടിമറിക്കാൻ ശ്രമിക്കുന്ന പൊലീസ്​, ഇത്തരത്തിൽ സംസ്ഥാനത്ത്​ ജനങ്ങൾക്ക്​ സമാധാനപരമായി ജീവിക്കാൻ കഴിയാത്ത അവസ്ഥയാണുള്ളത്​.

കോവിഡ്​ ബാധിതരായ രണ്ട്​ യുവതികൾ സംസ്ഥാനത്ത്​ പീഡിപ്പിക്കപ്പെട്ടപ്പോൾ കേരളത്തിൽ ഇങ്ങനെയൊക്കെ നടക്കുമോയെന്ന്​ ​എല്ലാവരും അത്​ഭുതപ്പെട്ടു. കേട്ടുകേൾവിയില്ലാത്ത സംഭവങ്ങളാണുണ്ടായത്​. പട്ടികജാതിയിൽപെട്ട യുവതിയെ സർക്കാറിൻെറ ആംബുലൻസ്​ ഡ്രൈവറാണ്​ പീഡിപ്പിച്ചതെങ്കിൽ ഭരതന്നൂരിൽ കോവിഡ്​ നിരീക്ഷണത്തിൽ കഴിഞ്ഞ യുവതിയെ സർക്കാറിൻെറ ഹെൽത്ത്​ ഇൻസ്​പെക്​ടറാണ്​ രണ്ട്​ ദിവസം പീഡിപ്പിച്ചത്​. ഇൗ വിഷയത്തിൽ ആരോഗ്യ മന്ത്രി മറുപടി പറയണം. ഇതാണോ സർക്കാറിൻെറ കോവിഡ്​ പ്രതിരോധത്തിലെ ലോകമാതൃകയെന്നും ചെന്നിത്തല ചോദിച്ചു.

പി.ആർ ഏജൻസികളെ ഉപയോഗിച്ച്​ ലോകം മുഴുവൻ തങ്ങൾ ഒന്നാമതാണെന്ന്​ വീമ്പിളക്കിയ സർക്കാർ കേരളത്തെ നാണം കെടുത്തി. ആരോഗ്യ മന്ത്രി ഒരു നിമിഷം പോലും അധികാരത്തിലിരിക്കാൻ അർഹതയില്ലെന്ന്​ തെളിയിച്ചിരിക്കുന്നു. ആരോഗ്യമന്ത്രിക്ക്​ ധാർമികതയു​ണ്ടെങ്കിൽ രാജിവെച്ചു പോവുകയാണ്​ വേണ്ടതെന്നും ചെന്നിത്തല പറഞ്ഞു. സെപ്​തംബർ 22ന്​ സെക്രട്ടറിയേറ്റിന്​ മുമ്പിൽ യു.ഡി.എഫിൻെറ നേതൃത്വത്തിൽ ഉപവാസ സമരം നടക്കുമെന്നും ചെന്നിത്തല കൂട്ടിച്ചേർത്തു.

കുളത്തുപ്പുഴയിൽ കൊവിഡ് നിരീക്ഷണത്തിലായിരുന്ന യുവതിയെ പീഡിപ്പിച്ച ആരോഗ്യപ്രവർത്തകൻ കോണ്‍ഗ്രസ് സംഘടനയായ എൻ.ജി.ഒ അസോസിയേഷൻ പ്രവർത്തകൻ ആണോ എന്ന മാധ്യമപ്രവർത്തകൻെറ ചോദ്യത്തിന്​ ഡി.വൈ.എഫ്​ ഐക്കാർക്ക്​ മത്രമേ പീഡിപ്പിക്കാൻ പാടുള്ളൂവെന്ന്​​ എവിടെയെങ്കിലും എഴുതി വച്ചിട്ടുണ്ടോ എന്നായിരുന്നു ചെന്നിത്തലയുടെ മറുചോദ്യം. എൻ.ജി.ഒ അസോസിയേഷനാണ്​, കോൺഗ്രസുകാരനാണ്​ എന്നിങ്ങനെ കള്ളം പ്രചരിപ്പിക്കുകയാണെന്നും അദ്ദേഹം ആരോപിച്ചു.