തീരുമാനമായി; കൃഷ്​ണൻകുട്ടി 'വൈദ്യുതി വകുപ്പു മന്ത്രി' തന്നെ

തിരുവനന്തപുരം: കെ. കൃഷ്​ണൻകുട്ടിയുടെ ഒൗദ്യോഗിക സ്ഥാനപ്പേരായി വൈദ്യുതി വകുപ്പു​മന്ത്രിയെന്നു​തന്നെ നിയമസഭാ രേഖകളിൽ ഉപയോഗിക്കും. ഉൗർജ വകുപ്പുമന്ത്രിയെന്നും വൈദ്യുതി വകുപ്പുമന്ത്രിയെന്നും വ്യത്യസ്​ത സന്ദർഭങ്ങളിൽ ഉപയോഗിച്ചെന്ന്​ മഞ്ഞളാംകുഴി അലി ക്രമപ്രശ്​നം ഉന്നയിച്ചിരുന്നു.

പൊതുഭരണ വകുപ്പ്​ ജൂണ്‍ 24ന്​ ഇറക്കിയ സർക്കുലറിൽ 'വൈദ്യുതി വകുപ്പുമന്ത്രി' എന്ന് വ്യക്തത വരുത്തിയെന്നും നിയമസഭാ രേഖകളില്‍ 'വൈദ്യുതി വകുപ്പുമന്ത്രി' എന്ന് ശരിയായ രീതിയിലാണ് ഉപയോഗിക്കുന്നതെന്നും സ്​പീക്കർ എം.ബി. രാജേഷ്​ റൂളിങ്ങിൽ വ്യക്തമാക്കി. പ്രകടമായ അര്‍ഥവ്യത്യാസമില്ലെങ്കിലും ഭാവിയില്‍ ഇത്തരം പിശകുകള്‍ സംഭവിക്കാതിരിക്കാന്‍ ബന്ധപ്പെട്ടവര്‍ക്ക് നിര്‍ദേശം നല്‍കുമെന്നും സ്​പീക്കർ സഭയിൽ അറിയിച്ചു.

പുതിയ മന്ത്രിസഭ നിലവില്‍ വന്നപ്പോൾ മന്ത്രിമാരുടെ വകുപ്പുകള്‍ നിശ്ചയിച്ച്​ പൊതുഭരണ വകുപ്പ് പുറപ്പെടുവിച്ച സര്‍ക്കുലര്‍ ഇംഗ്ലീഷിലായിരുന്നതിനാലാണ്​ 'ഊർജ വകുപ്പുമന്ത്രി' എന്ന് മലയാളത്തില്‍ വിവര്‍ത്തനം ചെയ്തതെന്നും സ്​പീക്കർ അറിയിച്ചു.