ലോകായുക്ത നിയമഭേദഗതി മടിശ്ശീലയിൽ കനമുള്ളതിനാൽ -കെ. മുരളീധരൻ

തിരുവനന്തപുരം: മടിശ്ശീലയിൽ കനമുള്ളതിനാലാണ്​ ലോകായുക്തയെ ഭയന്ന്​ സർക്കാർ നിയമഭേദഗതി കൊണ്ടുവരുന്നതെന്ന്​ കെ. മുരളീധരൻ എം.പി. ഓർഡിനൻസ്​ നീക്കത്തിൽ നിന്ന്​ സർക്കാർ പിന്മാറണമെന്നും അദ്ദേഹം വാർത്തസമ്മേളനത്തിൽ ആവശ്യപ്പെട്ടു.

നിലവി​ലെ നിയമത്തിലെ ഏത്​​ ഭേദഗതിയോടും തങ്ങൾക്ക്​ എതിർപ്പുണ്ട്​. ലോകായുക്തനിയമം കൊണ്ടുവന്നപ്പോൾ നിയമസഭയിൽ അന്ന്​ ഇ.കെ. നായനാർ പറഞ്ഞതാണ്​ ഇന്ന്​ കോടിയേരി ബാലകൃഷ്ണന്‍റെ വാദങ്ങൾക്കുള്ള മറുപടി. കുറച്ചുനാളുകളായി ജനഹിതം മനസ്സിലാക്കാതെയാണ്​ ​കോടിയേരിയുടെ പ്രതികരണങ്ങൾ. ഗവർണറെ കൊണ്ട്​ ശിപാർശ ചെയ്യിച്ച്​ സർക്കാറിനെ പുറത്താക്കാമെന്ന്​ ​കോടിയേരി പറയുംവിധം ലോകായുക്തനിയമത്തിൽ വ്യവസ്ഥയില്ല. ഈ നിയമം ഉണ്ടെങ്കിലും ഇല്ലെങ്കിലും കേന്ദ്രത്തിന്​ സംസ്ഥാനഭരണത്തിൽ ഇടപെടാനാകും. അതിന്​ ലോകയുക്തനിയമത്തിന്‍റെ ആവശ്യമില്ല. നിയമസഭ ഉടൻ ചേരാനിരിക്കെ ധിറുതിപിടിച്ച്​ ഓർഡിനൻസ്​ കൊണ്ടുവരാൻ സർക്കാർ ശ്രമിക്കുന്നത്​ മുഖ്യമന്ത്രിക്കും മന്ത്രി ബിന്ദുവിനും എതിരെ ലോകായുക്തയിൽ പരാതിയുള്ളതിനാലാണ്​.

മുഖ്യമന്ത്രി​ ചികിത്സക്ക്​ പോയതോടെ ആരോഗ്യവകുപ്പ്​ നാഥനില്ലാ കളരിയായി. ആരോഗ്യവകുപ്പ്​ ഉദ്യോഗസ്ഥരെ ജനപ്രതിനിധികൾ ഉൾപ്പെടെ ഫോണിൽ വിളിച്ചാൽപോലും കിട്ടുന്നില്ല. ദേശീയപതാക കെട്ടുന്നത്​ മന്ത്രിയല്ലെന്നത്​​ യാഥാർഥ്യമാണെങ്കിലും തലതിരിച്ച്​ ഉയർത്തിയ പതാകയെ സല്യൂട്ട്​ ചെയ്തിട്ടും പിഴവ്​ മനസ്സിലാക്കാത്ത മന്ത്രി പൊതുപ്രവർത്തകനായി തുടരാൻ യോഗ്യനല്ലെന്നും മുരളി പറഞ്ഞു.