വിഴിഞ്ഞം തുറമുഖ നിർമാണം നിർത്തിവെച്ച്​ ചർച്ച നടത്തണമെന്ന് കെ. മുരളീധരൻ

തിരുവനന്തപുരം: മത്സ്യത്തൊഴിലാളികളുമായി ചർച്ച നടത്തി പ്രശ്നങ്ങൾ പരിഹരിക്കുംവരെ താൽക്കാലികമായി വിഴിഞ്ഞം തുറമുഖ നിർമാണം നിർത്തിവെക്കണമെന്ന്​ കെ. മുരളീധരൻ. പൊലീസ്​ സ്​റ്റേഷൻ ആക്രമണമുൾപ്പെടെയുള്ള സംഭവങ്ങളോട്​ യോജിപ്പില്ല. തെറ്റുകാരെ അറസ്റ്റ്​ ചെയ്യാം. പക്ഷേ, അതിന്‍റെ പേരിൽ ഒരു സമൂഹത്തെ മുഴുവൻ തെറ്റുകാരാക്കാൻ ശ്രമിച്ചാൽ അനുവദിക്കില്ലെന്നും അദ്ദേഹം വാർത്തസമ്മേളനത്തിൽ പറഞ്ഞു.

അദാനി പറയുന്നിടത്ത്​ ഒപ്പിട്ടുനൽകുന്ന സ്ഥിതിയിലാണ്​ സംസ്ഥാന സർക്കാർ. യു.ഡി.എഫ്​ ഭരണകാലത്ത്​ വിഴിഞ്ഞം തുറമുഖ നിർമാണത്തിന്​ തറക്കല്ലിടുമ്പോൾ ജനം സ്​നേഹത്തോടെയാണ്​ സ്വീകരിച്ചത്​. തൊഴിൽ നഷ്ടമാകുന്നവർക്കുള്ള പാക്കേജ്​ ഉൾപ്പെടെ പ്രഖ്യാപിച്ചാണ്​ അന്ന്​​ സർക്കാർ മുന്നോട്ടുപോയത്​. ഇടതു സർക്കാറിനും കരാർ ഏറ്റെടുത്ത അദാനിക്കും വാക്കുപാലിക്കാനായില്ല. ഇ​തോടെയാണ്​ ക്ഷമ നഷ്ടമായ മത്സ്യത്തൊഴിലാളികൾ സമരം തുടങ്ങിയത്​.

എന്നാൽ, വികസനത്തിനെതിരെ ഒരു സമുദായം നടത്തുന്ന സമരമായി സർക്കാർ അതിനെ വരുത്തിത്തീർത്തു. ഗുജറാത്തിൽ മോദി നടത്തുന്ന അതേ വിഭജന തന്ത്രമാണ്​ ഇടതു സർക്കാർ വിഴിഞ്ഞത്തും സ്വീകരിച്ചത്​. മത്സ്യത്തൊഴിലാളികളുടെ ആശങ്ക പൂർണമായി പരിഹരിച്ചശേഷമേ ഇനി പദ്ധതിയുമായി മുന്നോട്ടുപോകാവൂ. പ്രശ്​നം പരിഹരിക്കാൻ മുഖ്യമന്ത്രി യോഗം വിളിച്ച്​ ചർച്ച നടത്തണം.

സമരത്തിന്‍റെ പേരിൽ ആർച്ച്​ ബിഷപ്പിനെതിരെ കേസെടുത്തത്​ അംഗീകരിക്കാനാകില്ല. അദാനിക്കുണ്ടായ 200 കോടി നഷ്ടം മത്സ്യത്തൊഴിലാളികളിൽ നിന്ന്​ ഈടാക്കാനുള്ള ശ്രമം പിച്ചച്ചട്ടിയിൽ കൈയിട്ട്​ വാരലാണ്​. മത്സ്യത്തൊഴിലാളികളെ കേസിൽപെടുത്തി ദ്രോഹിച്ചാൽ കോൺഗ്രസ്​ കൈയുംകെട്ടി നിൽക്കില്ലെന്നും അദ്ദേഹം പറഞ്ഞു.