കെ-റെയിൽ: ഊഹക്കണക്കുകൾ നിറച്ച്​ ഡി.പി.ആർ

കോട്ടയം: ഓരോ പദ്ധതിയുടെയും സൂക്ഷ്മമായ വിവരങ്ങൾ ഉൾപ്പെടുന്നതാണ്​ വിശദ പദ്ധതി രൂപരേഖ (ഡി.പി.ആർ) എന്നിരിക്കെ, കെ-റെയിലിന്‍റെ പേരിൽ പുറത്തുവിട്ട ഡി.പി.ആറിൽ നിറഞ്ഞിരിക്കുന്നത്​ ഊഹക്കണക്കുകൾ മാത്രം. പദ്ധതിരേഖയുടെ പതിനഞ്ചാം അധ്യായത്തിലെ 22–ാം പേജിൽ ബേസിസ്​ ഓഫ് ക്യാപ്പിറ്റൽ കോസ്റ്റ്​ എസ്​റ്റിമേഷൻ എന്ന തലക്കെട്ടിനു കീഴിൽ വരുന്ന വിവരങ്ങളിൽ മിക്കതും കൃത്യമായ പരിശോധനകളുടെയും കണക്കു കൂട്ടലുകളുടെയും അടിസ്ഥാനത്തിൽ കണ്ടെത്തിയവയല്ലെന്ന്​ നിർമാണ രംഗത്തെ വിദഗ്​ധരും റെയിൽവെ എഞ്ചിനീയർമാരും പറയുന്നു.

മൺതിട്ട എന്ന വൻമതിൽ, മണ്ണുതുരന്ന് അടച്ച് ടണൽ പോലെയാക്കുന്ന കട്ട് ആന്‍റ്​ കവർ, മലയിടിക്കൽ എന്ന കട്ടിങള, ആകാശപാത, തുരങ്കം, ട്രയിൻ ബോഗി, റെയിൽപാളങ്ങൾ, സിഗ്​നലിങ്​, ഡിപ്പോ എന്നിവയുടെ മൂലധന ചെലവ്​ കണ്ടെത്തിയിരിക്കുന്നത്​ സമാനമായ മറ്റു നിർമാണങ്ങളിൽ വന്നിരിക്കുന്ന ചെലവുകളെ അടിസ്​ഥാനമാക്കിയാണെന്നു ഡി.പി.ആർ. തയാറാക്കിയ ഫ്രഞ്ച്​ കൺസൾട്ടിങ്​ കമ്പനി സിസ്​ട്ര തന്നെ റിപ്പോർട്ടിൽ വ്യക്തമാക്കിയിട്ടുണ്ട്​. എന്നാൽ, നാളിതുവരെ സിസ്​ട്ര ഇന്ത്യയിൽ ഒരിടത്തും അതിവേഗപാതയുടേയോ അർധ അതിവേഗപാതയുടേയോ നിർമ്മാണം ഏറ്റെടുത്തു നടത്തുകയോ അത്തരം പദ്ധതികൾക്കായി വിശദമായ എസ്റ്റിമേറ്റ്​റ്റ് എടുക്കുകയോ ചെയ്തിട്ടില്ല.

കെ-റെയിലിലെ പതിനൊന്നു സ്റ്റേഷനുകളുടെയും നിർമാണ ചെലവു കണക്കാക്കിയിരിക്കുന്നത് അതാത് സ്റ്റേഷനുകളുടെ നീളത്തിന്‍റെയും വീതിയുടെയും മാത്രം അടിസ്​ഥാനത്തിലാണ്. 20 മീറ്റർ താഴ്ചയിൽ മണ്ണെടുത്ത് റെയിലിടാൻ ഒരു കിലോമീറ്ററിന്​ 33.30 കോടി, എട്ടു മീറ്റർ പൊക്കത്തിൽ ആകാശപാതക്ക്​ 33.50 കോടി, 10 മീറ്റർ പൊക്കത്തിൽ ആകാശപാതക്ക്​ 38.80 കോടി, 15 മീറ്റർ പൊക്കത്തിൽ ആകാശപാതക്ക്​ 39.30 കോടി, 20 മീറ്റർ പൊക്കത്തിൽ ആകാശപാതക്ക്​ 50.00 കോടി രണ്ടു മീറ്റർ പൊക്കത്തിൽ മൺതിട്ട നിർമിച്ച്​ പാളമിടാൻ 3.80 കോടി, മൂന്നു മീറ്റർ പൊക്കത്തിൽ 6.80 കോടി, 3.5 മീറ്റർ പൊക്കത്തിൽ 8.20 ​കോടി, നാലു മീറ്റർ പൊക്കത്തിൽ 10.50 കോടി, അഞ്ചു മീറ്റർ പൊക്കത്തിൽ 12.90, ആറു മീറ്റർ പൊക്കത്തിൽ 12.20, ഏഴു മീറ്റർ പൊക്കത്തിൽ, 19.30 കോടി എന്നിങ്ങനെയും​ തുക വകയിരുത്തിയിട്ടുണ്ട്​.

വിവിധ പ്രദേശങ്ങളിൽ നിർമാണം നടത്തുമ്പോൾ പ്രാദേശിക സാഹചര്യങ്ങൾ അനുസരിച്ച്​ നിർമാണ ചെലവിൽ വ്യതിയാനമുണ്ടാകുമെന്ന പ്രാഥമിക തത്വംപോലും പാലിക്കാതെയാണ്​ ഇത്തരത്തിൽ ചെലവ്​ കണക്കാക്കിയിരിക്കുന്നത്​. വിവിധ സ്​ഥലങ്ങളിലായി പണിയുന്ന 11.53 കിലോമീറ്റർ തുരങ്കത്തിനായി 1325.72 കോടി രൂപയാണ് വകയിരുത്തിയിരിക്കുന്നത്​. എന്നാൽ, തൃശൂർ- പാലക്കാട് ദേശീയ പാതയിൽ എട്ടുവർഷം മുമ്പ്​ പണിതുടങ്ങിയ, 992 മീറ്റർ നീളവും 14 മീറ്റർ വീതിയും 10 മീറ്റർ ഉയരവുമുള്ള കുതിരാൻ ഇരട്ടതുരങ്കത്തിനായി 200 കോടിയാണ്​ ചെലവാക്കിയത്​. ഈ കണക്ക്​ പരിഗണിച്ചാൽപോലും 11.53 നീളം വരുന്ന സിൽവർ ലൈനിലെ തുരങ്കങ്ങൾക്ക്​ 2300 കോടി രൂപയെങ്കിലും ചെലവു വരും.

എന്നിട്ടാണ്​ കിലോമീറ്ററിന്​ 115 കോടി എന്ന നിരക്കിൽ സിൽവർലൈനിനായി തുരങ്കം നിർമിക്കാമെന്ന അവകാശവാദവുമായി ഡി.പി.ആർ പുറത്തിറങ്ങിയിരിക്കുന്നത്​. വിശദമായ പദ്ധതി രൂപരേഖയിൽ 2020 ലെ കണക്കു പ്രകാരം പദ്ധതി ചെലവ് 63940.67 കോടി രൂപയായാണ് കണക്കാക്കിയിരിക്കുന്നത്​. 2022 ൽ പുറത്തുവിട്ടപ്പോഴും നിലവിലെ വിപണി വിലയുടെ അടിസ്ഥാനത്തിൽ പദ്ധതി തുക പുതുക്കി നിശ്ചയിച്ചിട്ടില്ല.

ഊഹക്കണക്കിലാണ്​ പദ്ധതി ഉണ്ടാക്കിയതെങ്കിലും പദ്ധതി ചെലവിന്‍റെ രണ്ടു ശതമാനമായ 672.54 കോടി രൂപ ഡിസൈൻ ഇനത്തിലും നാലുശതമാനമായ 1345 കോടി രൂപ പദ്ധതി മാനേജ്​മെന്‍റ്​ ഇനത്തിലും ഉൾപ്പെടുത്തിയിട്ടുണ്ട്.