കെ റെയിൽ: രാജ്യസഭയിൽ എളമരം കരീമും കെ.സി വേണുഗോപാലും നേർക്കുനേർ

ന്യൂഡൽഹി: 'സിൽവർ ലൈൻ' പാതക്ക്​ അനുമതി നൽകണമെന്ന ആവശ്യത്തെ ചൊല്ലി രാജ്യസഭയിൽ ബഹളം. സി.പി.എം രാജ്യസഭാ നേതാവ്​ എളമരം കരീമിന്‍റെ ആവശ്യം അനുവദിക്കരുതെന്ന്​ പറഞ്ഞ്​ എ.ഐ.സി.സി ജനറൽ സെക്രട്ടറി കെ.സി വേണുഗോപാൽ രംഗത്തുവന്നു​. അതേക്കുറിച്ച്​ സഭയിൽ വിവാദം വേണ്ടെന്നും സർക്കാർ പദ്ധതി പഠിക്കട്ടെയെന്നും ഗുണദോഷങ്ങൾ എല്ലാം പരിശോധിച്ച്​ അന്തിമ തീരുമാനം എടുക്കട്ടെ എന്നും പറഞ്ഞ്​ രാജ്യസഭാ ചെയർമാൻ വെങ്കയ്യ നായിഡു ബഹളത്തിന്​ തടയിട്ടു.

അർധ അതിവേഗ റയിൽ പാത നാല്​ മണിക്കൂർ കൊണ്ട്​ കേരളത്തിലെ രണ്ട്​ അറ്റങ്ങളെയും നാല്​ മണിക്കൂർ കൊണ്ട്​ ബന്ധിപ്പിക്കുന്നതാണെന്നും നിലവിൽ അത്​ 10 മുതൽ 12 മണിക്കൂർ വരെയാണെന്നും എളമരം കരീം പറഞ്ഞു. 200 കിലോ മീറ്റർ വേഗത്തിൽ ഒരു ദിവസം 80,000 പേർക്ക്​ യാത്ര ചെയ്യാനുള്ളതാണിത്​. സാധ്യതാപഠനം 2019ൽ നടന്നിട്ടുണ്ട്​. റയിൽവെ ബോർഡ്​ തത്വത്തിൽ അംഗീകാരം നൽകിയിട്ടുണ്ട്. 2019 ജൂണിൽ വിശദ പദ്ധതി റിപ്പോർട്ട്​ റയിൽവെ മന്ത്രാലയത്തിന്​ സമർപ്പിച്ചതാണെന്നും കരീം തുടർന്നു.

പദ്ധതിയുടെ തയാറടെുപ്പിനുള്ള പ്രവർത്തനങ്ങൾ മുന്നോട്ടുപോകുകയാണെന്ന്​ കൂടി കരീം പറഞ്ഞതോടെ വേണുഗോപാൽ പ്രതിഷേധവുമായി എഴുന്നേറ്റു​. വേണുഗോപാൽ എന്താണ്​ പറയുന്നതെന്ന്​ ചെയർമാൻ നായിഡു ചോദിക്കുകയും ചെയ്തു. അതിനെ കരീം ചോദ്യം ​ചെയ്തപ്പോൾ എല്ലാവർക്കും അവരുടെ അഭിപ്രായം പറയാനുള്ള സ്വാതന്ത്ര്യമുണ്ടെന്ന്​ പറഞ്ഞ്​ നായിഡു തള്ളി.

പരിസ്ഥിതിക്ക്​ ഈ പദ്ധതി വരുത്തുന്ന ആഘാതങ്ങൾ പരിഗണിക്കാതെ കേരള സർക്കാർ ജനങ്ങൾക്ക്​ മേൽ അടിച്ചേൽപിക്കുകയാണെന്ന്​ കെ.സി വേണുഗോപാൽ പറഞ്ഞു. കേരളം ഒന്നടങ്കം ഈ പദ്ധതിക്ക്​ എതിരാണെന്നും വേണുഗോപാൽ കൂട്ടിച്ചേർത്തു.