സിൽവർ ലൈൻ പദ്ധതി പ്രായോ​ഗികമല്ലെന്ന അലോക് കുമാർ വർമയുടെ പ്രചാരണം വാസ്തവവിരുദ്ധമെന്ന്​ കെ-റെയിൽ

തിരുവനന്തപുരം: സിൽവർ ലൈൻ പദ്ധതി പ്രായോ​ഗികമല്ലെന്ന റെയിൽവേ മുൻ ചീഫ് എൻജിനീയർ അലോക് കുമാർ വർമയുടെ പ്രചാരണം ശരിയല്ലെന്ന് കെ-റെയിൽ. ജനകീയ പ്രതിരോധസമിതി സംഘടിപ്പിച്ച ചർച്ചയിൽ വാസ്തവവിരുദ്ധ കാര്യങ്ങളാണ് വർമ പറഞ്ഞതെന്നും ഫേസ്ബുക്ക് പോസ്റ്റിൽ പറയുന്നു.

സിൽവർ ലൈനിന്​ നിതി ആയോ​ഗ് 1.3 ലക്ഷം കോടി രൂപ കണക്കാക്കി എന്നാണ് അലോക് കുമാർ പറഞ്ഞത്. നിതി ആയോ​ഗ് അത്തരം ഒരു കണക്കുകൂട്ടലും നടത്തിയിട്ടില്ല. ആർ.ആർ.ടി.എസ്, മെട്രോ റെയിൽ എന്നിവയുടെ നിർമാണ​െച്ചലവി​െനക്കാൾ ചെലവ് കുറയാനുള്ള കാരണം മാത്രമാണ് നിതി ആയോ​ഗ് ചോദിച്ചത്. അർധ അതിവേ​ഗ റെയിൽ പദ്ധതിയെ അതിവേ​ഗ റെയിൽ പാതയുമായോ മെ​േട്രാ, ആർ.ആർ.ടി.എസ് എന്നിവയുമായോ താരതമ്യം ചെയ്യാനാകില്ലെന്ന് കൃത്യമായി ബോധ്യപ്പെടുത്തി​.

നിതി ആയോ​ഗ് ഉന്നയിച്ച എല്ലാ ചോദ്യത്തിനും കൃത്യമായ മറുപടി നൽകിയിട്ടുണ്ട്. അത്​ ബോധ്യപ്പെട്ടാണ് വിദേശവായ്പക്ക്​ അവർ ശിപാർശ ചെയ്തത്. ഡി.പി.ആർ പ്രകാരമുള്ള 63,941കോടി രൂപയുടെ എസ്റ്റിമേറ്റ് പ്രായോ​ഗികവും ന്യായീകരിക്കാനാവുന്നതുമാണെന്ന് റെയിൽവേയുടെ സ്വതന്ത്ര ഏജൻസി റൈറ്റ്​സിന്‍റെ​ പഠനത്തിലും ബോധ്യപ്പെട്ടതാണ്. സാധ്യതാപഠനം നടത്തിയ സിസ്ട്രയുടെ ഭാ​ഗമായി 107 ദിവസം മാത്രമാണ് (2018 ഡിസംബർ നാല്​ മുതൽ 2019 മാർച്ച് 20 വരെ) അലോക് കുമാർ പ്രവർത്തിച്ചത്. സിസ്ട്ര സംഘത്തിലെ 18 വിദഗ്ധരിൽ ഒരാൾ മാത്രമായിരുന്നു അദ്ദേഹം. ഡി.പി.ആർ തയാറാക്കിയ ഘട്ടത്തിൽ ഒരു ദിവസം പോലും അദ്ദേഹം സിസ്ട്രയിൽ പ്രവർത്തിച്ചിട്ടില്ല.

പ്രാഥമിക സാധ്യതാപഠനത്തിൽ കെ-റെയിലിന്‍റെ അഭിപ്രായങ്ങളോ സംസ്ഥാനത്തിന്‍റെ ആവശ്യങ്ങളോ പരി​ഗണിക്കാതെ തികച്ചും ഏകാധിപത്യ നിലപാടാണ് അലോക് കുമാർ സ്വീകരിച്ചത്. സിസ്ട്ര ടീമിന്‍റെ ഡെപ്യൂട്ടി പ്രോജക്ട് ഡയറക്ടർ ആയിരുന്ന വർമ ഉൾപ്പെട്ട സംഘം നൽകിയ കരട്​ റിപ്പോർട്ടിനെക്കുറിച്ച് സംശയങ്ങൾ ഉന്നയിച്ചപ്പോൾ മറുപടി നൽകാതെ മാധ്യമങ്ങളുടെ മുന്നിൽ പ്രത്യക്ഷപ്പെട്ട് കെ-റെയിലിനെതിരെ സംസാരിക്കുകയായിരുന്നു.

ന​ഗരത്തിൽനിന്നുമാറി സ്റ്റേഷൻ സ്ഥാപിക്കുന്നത് യാത്രയെ ബാധിക്കുമെന്നാണ് മറ്റൊരു വാദം. ഇത് കേരളത്തിലെ നഗര-​ഗ്രാമങ്ങളെക്കുറിച്ച് അദ്ദേഹത്തിന് ഒരു ധാരണയുമില്ലെന്നതിന്‍റെ തെളിവാണ്. ഏറ്റവും ആധുനിക സാങ്കേതിക സംവിധാനങ്ങൾ ഉപയോ​ഗിച്ചാണ് എല്ലാ പഠനവും നടത്തിയത്. 93 ശതമാനം അലൈൻമെന്‍റും ദുർബലമായ ഭൂമിയിലാണെന്ന് പറയുന്ന റിപ്പോർട്ട് ഏതാണെന്ന്​ വെളിപ്പെടുത്തണമെന്നും കെ-റെയിൽ ആവശ്യപ്പെട്ടു.