കെ റെയിൽ: ഇപ്പോൾ നടക്കുന്നത്​ സാമൂഹികാഘാത പഠനം; ഭൂമി ഏറ്റെടുക്കൽ ആശങ്ക വേണ്ടെന്ന് ഹൈകോടതി

കൊച്ചി: സിൽവർ ലൈൻ പദ്ധതിക്കായി ഇപ്പോൾ നടക്കുന്നത്​ സാമൂഹികാഘാത പഠനവുമായി ബന്ധപ്പെട്ട നടപടിയായതിനാൽ ഭൂമി ഏറ്റെടുക്കുമെന്ന ആശങ്ക വേണ്ടെന്ന് ഹൈകോടതി. സർവേക്കല്ലുകൾ സ്ഥാപിച്ചതിന്റെ പേരിൽ ഒരിഞ്ചു ഭൂമിപോലും മരവിപ്പിച്ചിട്ടില്ലെന്നാണ് ലഭിക്കുന്ന വിവരം. സർവേ തടയരുതെന്ന്​ സുപ്രീംകോടതിയും നിർദേശിച്ചിട്ടുള്ളതിനാൽ അതിൽ ഇടപെടാനാവില്ല. കല്ലിട്ട ഭൂമിയുടെ ഈടിന്മേൽ വായ്പക്ക്​ തടസ്സമുണ്ടാകില്ലെന്ന്​ സർക്കാറും പ്രഖ്യാപിച്ചിട്ടുണ്ടെന്നും ഹൈകോടതി വ്യക്തമാക്കി​.

എന്നാൽ, സാമൂഹികാഘാത പഠനം ചട്ടപ്രകാരമാണോ എന്നതടക്കം കാര്യങ്ങളിൽ വ്യക്തത​ വേണ്ടതുണ്ട്​. കെ-റെയിലും റെയിൽവേയും പങ്കാളിയായ സംയുക്ത സംരംഭമാണ് സിൽവർ ലൈൻ എന്നാണ് പറയുന്നത്. അതേസമയം, സർവേ അടക്കം നടപടികളിൽ ചെറിയ പങ്കാളിയായ റെയിൽവേ മൗനം പാലിക്കുന്നത് അത്ഭുതകരമാണെന്നും ജസ്റ്റിസ്​ ദേവൻ രാമചന്ദ്രൻ നിരീക്ഷിച്ചു. കെ-റെയിൽ പദ്ധതിയുമായി ബന്ധപ്പെട്ട്​ സർവേ നടത്തുന്നത്​ ചോദ്യം ചെയ്ത്​ സമർപ്പിച്ച ഹരജികളാണ്​ കോടതിയുടെ പരിഗണനയിലുള്ളത്​.

കെ-റെയിൽ എന്ന്​ രേഖപ്പെടുത്തിയ കല്ലിടുന്നതിനെ കഴിഞ്ഞ ദിവസങ്ങളിൽ കോടതി വിമർശിച്ചിരുന്നു. കല്ലിടുന്ന സ്ഥലം ഈടുവെച്ച്​ വായ്പയെടുക്കാൻ സ്ഥലം ഉടമകൾക്ക്​ കഴിയുമോയെന്ന ആശങ്കയും പ്രകടിപ്പിച്ചിരുന്നു. ഇതിന്​ പിന്നാലെയാണ്​ വായ്പക്ക്​ തടസ്സമുണ്ടാകില്ലെന്ന്​ സർക്കാർ വ്യക്തമാക്കിയത്​. ഹരജിയിൽ ഉന്നയിക്കാത്ത കാര്യങ്ങളിൽ കോടതി ഇടപെടുന്നതിനെ സർക്കാർ അഭിഭാഷകൻ എതിർക്കുകയും ചെയ്തിരുന്നു.

ബുധനാഴ്​ച ഹരജി പരിഗണിക്കവെയാണ്​ റെയിൽവേയുടെ മൗനത്തെക്കുറിച്ച്​ കോടതി ആശങ്കയറിയിച്ചത്​. പദ്ധതിയിൽ 49 ശതമാനം പങ്കാളിത്തമുള്ള കക്ഷിയാണ് റെയിൽവേ. സർവേയടക്കമുള്ള കാര്യങ്ങളിൽ തർക്കമുണ്ടായിട്ടും അവർ ഒന്നും വ്യക്തമാക്കിയിട്ടില്ല. സർവേയുടെ നിയമസാധുതയിൽ മാത്രമല്ല, സർവേക്ക്​ മുൻകൂർ നോട്ടീസ്​ നൽകേണ്ടതുണ്ടോ, കെ-റെയിൽ എന്നെഴുതിയ കല്ലിടേണ്ടതുണ്ടോ തുടങ്ങിയ കാര്യങ്ങളിലും വ്യക്തത വേണം​. ഇക്കാര്യങ്ങൾ പരിശോധിക്കുമെന്നും കോടതി വ്യക്തമാക്കി.

സിൽവർ ലൈൻ പദ്ധതി കേന്ദ്ര ഭരണ പ്രദേശമായ പുതുച്ചേരിയുടെ ഭാഗമായ മാഹിയിലൂടെയും കടന്നുപോകുന്നതിനാൽ സർവേ അടക്കം നടപടികൾ ചെയ്യേണ്ടത്​ കേന്ദ്ര സർക്കാറാണെന്ന വാദം ഹരജിക്കാർ ആവർത്തിച്ചു. എന്നാൽ, നിലവിൽ കേന്ദ്ര ഭരണ പ്രദേശങ്ങളിലൂടെ സിൽവർ ലൈൻ പദ്ധതി കടന്നുപോകുന്നില്ലെന്ന്​ കെ-റെയിൽ അഭിഭാഷകൻ വ്യക്തമാക്കി. അലൈൻമെന്‍റിന്​ ഇതുവരെ അന്തിമാനുമതി ആകാത്ത കാര്യം ചൂണ്ടിക്കാട്ടിയ കോടതി, ഹരജി വ്യാഴാഴ്ച പരിഗണിക്കാൻ മാറ്റി.