ആശ സമരം: സർക്കാർ അനുകൂല നിലപാടിൽ ഐ.എൻ.ടി.യു.സിക്ക്​ കെ.പി.സി.സി താക്കീത്; ഗുരുതര അച്ചടക്ക ലംഘനമെന്ന് കെ. സുധാകരൻ

​

തിരുവനന്തപുരം: സെക്രട്ടേറിയറ്റിനു​ മുന്നിലെ ആശ സമരവുമായി ബന്ധപ്പെട്ട്​ കോൺഗ്രസ്​ സമീപനത്തിന്​ ​വിരുദ്ധമായി നിലപാട്​ സ്വീകരിച്ച ഐ.എൻ.ടി.യു.സിക്ക്​ കെ.പി.സി.സിയുടെ താക്കീത്​. ആശമാർ ആരോഗ്യമന്ത്രിയുമായി നടന്ന ചർച്ചയിൽ സി.ഐ.ടി.യുവിനും എ.ഐ.ടി.യു.സിക്കുമൊപ്പം ഐ.എൻ.ടി.യു.സിയും പ​ങ്കെടുത്തെങ്കിലും സമരക്കാർക്കൊപ്പം നിൽക്കുന്നതിന്​ പകരം സർക്കാറിനൊപ്പം ഐ.എൻ.ടി.യു.സി നിലകൊണ്ടെന്ന ​വ്യാപക വിമർശനത്തിന്​ പിന്നാലെയാണ്​ നടപടി.

ഭരണാനുകൂല സംഘടനകളായ സി.ഐ.ടി.യുവിന്‍റെയും എ.ഐ.ടി.യു.സിയുടെയും സർക്കാർ അനുകൂല നിലപാട്​ മനസ്സിലാക്കാമെങ്കിലും ​ഐ.എൻ.ടി.യു.സിയുടേത്​ അ​പ്രതീക്ഷിതമായിരുന്നു. ഇതിന്​ പിന്നാലെയാണ്​ കെ.പി.സി.സി നേതൃത്വം ഐ.എൻ.ടി.യു.സിക്ക്​ നേരെ നിലപാട്​ കടുപ്പിച്ചത്​.

കഴിഞ്ഞ ദിവസം ഇന്ദിര ഭവനിൽ കെ.പി.സി.സി അധ്യക്ഷൻ കെ. സുധാകരനെ കണ്ട ഐ.എൻ.ടി.യു.സി പ്രസിഡന്റ് ആർ. ചന്ദ്രശേഖരൻ തന്‍റെ നിലപാട്​ വിശദീകരിച്ചു. മന്ത്രി വിളിച്ച ചർച്ചയിൽ സമരത്തിന്റെ ആവശ്യം പഠിക്കാൻ കമ്മിറ്റിയെ വെക്കണമെന്ന നിർദേശം മുന്നോട്ടുവെച്ചത്​ താനല്ലെന്നും കോൺഗ്രസിന്​ വിരുദ്ധമല്ല തന്റെ നിലപാടെന്നും ചന്ദ്രശേഖരൻ കൂട്ടിച്ചേർത്തു.

ആശ സമരത്തെ പിന്തുണക്കുന്ന നിലപാടാണ്​ കോൺഗ്രസിനുള്ളതെന്നും അതിന്​ വിരുദ്ധമായ പ്രവർത്തനം അംഗീകരിക്കാനാകില്ലെന്നും കെ. സുധാകരൻ വ്യക്തമാക്കി. എ.ഐ.സി.സി യോഗത്തിനു​ശേഷം തലസ്ഥാനത്ത്​ തിരിച്ചെത്തുമ്പോൾ വീണ്ടും കൂടിക്കാഴ്ചക്കെത്താനും ചന്ദ്രശേഖരനോട് ആവശ്യപ്പെട്ടിട്ടുണ്ട്.

ആദ്യഘട്ടത്തിൽ ആശ സമരത്തെ തള്ളിപ്പറയുന്ന നിലപാടാണ്​ ഐ.എൻ.ടി.യു.സി സ്വീകരിച്ചത്​. എന്നാൽ, പിന്നീട്​ ഇതിൽ മലക്കം മറിയുകയും സമരത്തെ പിന്തുണച്ച്​ രംഗത്തെത്തുകയുമായിരുന്നു. പിന്നാലെയാണ്​ ചർച്ചക്ക്​ വഴിയൊരുങ്ങിയത്​.