പ്രഫഷനൽ കോൺഗ്രസ് കോൺക്ലേവിൽ തരൂരിനൊപ്പം കെ. സുധാകരൻ പ​ങ്കെടുക്കില്ല

കൊച്ചി: ഞായറാഴ്ച കൊച്ചിയിൽ ശശി തരൂർ എം.പി പ​ങ്കെടുക്കുന്ന ചടങ്ങിൽ ഉദ്​ഘാടകനായ കെ.പി.സി.സി പ്രസിഡന്‍റ്​ കെ. സുധാകരൻ എത്തില്ലെന്ന്​ സൂചന. ഓൾ ഇന്ത്യ പ്രഫഷനൽസ് കോൺഗ്രസ് (എ.ഐ.പി.സി) സംസ്‌ഥാന സമ്മേളനത്തിൽ ഇരുവരും ഒരുമിച്ച്​ പ​ങ്കെടുക്കുമെന്നാണ്​ സംഘാടകർ പറഞ്ഞിരുന്നത്​. എന്നാൽ, ശനിയാഴ്​ച വൈകീട്ടാണ്​ സുധാകരൻ പ​ങ്കെടുക്കില്ലെന്ന അറിയിപ്പുണ്ടായത്​. എ.ഐ.പി.സി ദേശീയ പ്രസിഡന്‍റാണ്​ തരൂർ.

കെ.പി.സി.സി പ്രസിഡന്‍റ്​​ നിർദേശിച്ചതനുസരിച്ചാണ്​ സമ്മേളനം തീരുമാനിച്ചതെന്നും അദ്ദേഹത്തിന്‍റെ സൗകര്യം അനുസരിച്ചാണ്​ ഞായറാഴ്ച നിശ്ചയിച്ചതെന്നും എ.ഐ.പി.സി സംസ്ഥാന പ്രസിഡന്‍റ്​ ഡോ. എസ്​.എസ്​ ലാൽ പറഞ്ഞു. നേരത്തേ മറ്റ്​ പല തീയതികൾ തീരുമാനിച്ചിരുന്നുവെങ്കിലും അന്നെല്ലാം അദ്ദേഹത്തിന്​ അസൗകര്യമായിരുന്നു. ഓൺലൈനിലെങ്കിലും അദ്ദേഹം പ​ങ്കെടുക്കുമെന്നും ലാൽ പറഞ്ഞു.

ഞായറാഴ്ച എറണാകുളം പ്രസിഡൻസി ഹോട്ടലിൽ നടക്കുന്ന സമ്മേളനം രാവിലെ 9.30ന് സുധാകരൻ ഉദ്‌ഘാടനം ചെയ്യുമെന്നാണ്​ ഡോ. ലാൽ വാർത്ത സമ്മേളനത്തിൽ പറഞ്ഞിരുന്നത്​. വൈകീട്ട് നടക്കുന്ന ലീഡേഴ്‌സ് ഫോറത്തിന്‍റെ ഉദ്​ഘാടകൻ പ്രതിപക്ഷ നേതാവ് വി.ഡി. സതീശനാണ്​. ഹൈബി ഈഡൻ എം.പിയും മാത്യു കുഴൽനാടൻ എം.എൽ.എയും ഉദ്‌ഘാടന സെഷനിൽ തരൂരിനൊപ്പം പങ്കെടുക്കും.

ജില്ലകൾതോറും തരൂർ പ​​ങ്കെടുക്കുന്ന പരിപാടികളെ ചൊല്ലി കോൺഗ്രസിൽ വിവാദം പുകയുന്നതിനിടെയാണ്​ അദ്ദേഹവുമായി വേദി പങ്കിടുന്നതിൽനിന്ന്​ അവസാന നിമിഷം സുധാകരൻ പിന്മാറിയത്​.