അമിത്​ ഷാക്ക്​ മുന്നിൽ ഗോവിന്ദൻ ഒന്നുമല്ല, റിയാസ് വടക്കോട്ട്​ നോക്കാതെ റോഡിലെ കുഴിയടക്കാൻ നോക്ക് -കെ. സുരേന്ദ്രൻ

തൃശൂർ: അമിത്​ ഷാക്ക്​ മുന്നിൽ സി.പി.എം സംസ്ഥാന സെക്രട്ടറി എം.വി. ഗോവിന്ദൻ ഒന്നുമല്ലെന്ന്​ ബി.ജെ.പി സംസ്ഥാന പ്രസിഡന്‍റ്​ കെ. സുരേന്ദ്രൻ. മന്ത്രി മുഹമ്മദ്​ റിയാസിന്‍റെ ആക്ഷേപത്തോട്​ പ്രതികരിച്ചു. സി.പി.എം സംസ്ഥാനത്ത്​ നടത്തുന്ന യാത്രയെ ബി.ജെ.പി ഭയക്കുന്നുവെന്നും എം.വി. ഗോവിന്ദൻ നയിക്കുന്ന ജാഥ തൃശൂർ വിടുമ്പോൾ കേന്ദ്ര ആഭ്യന്തര മന്ത്രി അമിത്​ ഷാ തൃശൂരിൽ പൊതുപരിപാടിയിൽ പ​ങ്കെടുക്കാൻ എത്തുന്നത് അതുകൊണ്ടാണെന്നുമുള്ള മന്ത്രി മുഹമ്മദ്​ റിയാസിന്റെ പ്രസ്താവനയോട് പ്രതികരിക്കുകയായിരുന്നു സുരേന്ദ്രൻ.

‘കേരളത്തിൽ ഇനിയും ബി.ജെ.പി നേതാക്കളെത്തും. മാർച്ച്​ അഞ്ചിന്​ അമിത്​ ഷാ തൃശൂരിൽ വൻ പൊതുസമ്മേളനത്തെയാണ്​ അഭിസംബോധന ചെയ്യാൻ പോകുന്നത്​. അമിത്​ ഷാ വരുന്നതിൽ ചിലർക്ക്​, പ്രത്യേകിച്ച്​ മതഭീകരവാദികൾക്ക്​ വെപ്രാളമാണ്​. മന്ത്രി മുഹമ്മദ്​ റിയാസ് വടക്കോട്ട്​ നോക്കാതെ റോഡിലെ കുഴിയടക്കാൻ നോക്ക്’ - സുരേന്ദ്രൻ പരിഹസിച്ചു.

കേരളത്തിൽ പരക്കെ തട്ടിപ്പാണ്​. മുഖ്യമന്ത്രിയുടെ ദുരിതാശ്വാസ നിധിയിൽ നടന്നത്​ ശതകോടികളുടെ നീചമായ തട്ടിപ്പാണ്​​. സാധാരണക്കാരുടെ പണമാണ്​ കൊള്ളയടിച്ചത്​. ഇത്​ ഉദ്യോഗസ്ഥതലത്തിൽ ഒതുങ്ങുന്നതല്ല. കുറ്റവാളികളെ കണ്ടെത്താൻ സർക്കാർ തയാറായിട്ടില്ല. തട്ടിപ്പിൽ കോൺഗ്രസിനും കൈയുണ്ട്​. എം.വി. ഗോവിന്ദന്‍റെ യാത്ര നടക്കുമ്പോൾ സി.പി.എം കൂടുതൽ പ്രതിരോധലാണെന്നും ‘പ്രതിരോധ യാത്ര’എന്ന പേര്​ അന്വർഥമാണെന്നും സുരേന്ദ്രൻ പറഞ്ഞു. മുഖ്യമന്ത്രിയെ പ്രതിരോധിക്കാനാണ്​ യാത്ര നടത്തുന്നത്​. ഇന്ധന സെസിനെ സർക്കാർ ന്യായീകരിക്കുകയാണ്​. സി.പി.എം യാത്രയിലെ വാഹനങ്ങളിൽ ഇന്ധനം നിറച്ചത്​ മാഹിയിൽനിന്നാണ്​. മുഖ്യമന്ത്രിയുടെ വാഹനം കണ്ണൂരിലെത്തിയാൽ ഇന്ധനം നിറക്കുന്നത്​ മാഹിയിൽനിന്നാണ്​. ബി.ജെ.പിയുടെ ദേശീയ നേതാക്കൾ സംസ്ഥാന സർക്കാരിന്‍റെ തട്ടിപ്പുകൾ ചൂണ്ടിക്കാട്ടുമെന്നും സുരേന്ദ്രൻ പറഞ്ഞു.

ഹിന്ദു സംഘടനകളും മുസ്​ലിം സംഘടനകളും തമ്മിൽ സംസാരിക്കുന്നതിൽ എന്തിനാണ്​ സി.പി.എമ്മിന്​ വെപ്രാളമെന്നും ​ സുരേന്ദ്രൻ ചോദിച്ചു. ജമാഅത്തെ ഇസ്​ലാമിയുമായി ആർ.എസ്​.എസ്​ ചർച്ച നടത്തിയോ എന്നറിയില്ല. മുസ്​ലിം സംഘടനകളുമായാണ്​ ചർച്ച നടത്തിയെന്നാണ്​ ആർ.എസ്​.എസ്​ പറഞ്ഞത്​. ഹിന്ദുക്കളെയും മുസ്​ലിംകളെയും തമ്മിലടിപ്പിച്ച്​ സി.പി.എം ചോര കുടിക്കുകയാണെന്നും സുരേന്ദ്രൻ പറഞ്ഞു.